Ka Naʻi Aupuni, Volume V, Number 29, 11 February 1908 — Masiliona ke Koa -A ME- Maganolia ka Ipo [?] MOKUNA IV. [ARTICLE]

Masiliona ke Koa -A ME- Maganolia ka Ipo [?] MOKUNA IV.

A hala kekahi mau sekona o ko'u nana • ana aku ia Roderigo, a pela hoi oia ia'u, ia wa i huli aku ai o Roderigo a pane aku la i ka makuakane o maua: "E ko maua luaui makuakane," wahi ana i hoomaka aku ai e kamailio, "no'u, no keia keiki au ka maua i hele mai la imua ou, oia hoi, mamuli o kekahi mea i moeuhane mua ole ia e a'u, aole nohoi e ko'u hanau mua nei, aia hoi, ua hoohalawai ia mai la au me kekahi kono ikaika loa e hoi hou aku au i kuu aina hookama, mamuli o kekahi pilikia i loohia maluha o ka mea nana i malama ia'u mai ko'u mau Ia opio a hiki i ka la i hooukaia mai ai ka hānohano o ko'u lilo ana i koa Kavalia no Korodova. Aole hoi oia wale no, aka, ua makemake ia au e hoi aku e hoopakele i ka nohoalii o ke aliiwahine o ke aupuni i Iilo ai i aina hanau elua no'u nei. v Ua noonoo mai nei maua no keia haalele like ana iho o maua na keiki ia oe, a o ka oi loa aku nae, "owau nei no 0 ka mea o maua i noho ole imua o kou alo; a he kahi wale no keia Ia i ulia ai ka Iaki o ko'u hoea ana mai nei imua ou, ko maua luaui makuakane. A ua ike maua he hana keia e oleloia mai ai maua kau mau keiki nei, e ka lehulehu, he mau keiki aloha ole maua ia oe. A mamuli o ka Masiliona olelo ana mai nei ia'u, e hele mai maua imua ou e ninau ponoi ai i kou manao, no keia mea o ia ke kumu o ( ko maua hoea ana mai la imua ou. Aka, ke ike nei nae maua i kou manao, e ka makua eia no oe ke haawi mai nei 1 ka ae ana. Ano, e ae mai oe, e ko maua Iuaui, e hoike aku au imua ou i ke kumu nui o ko'u haalele ana iho ia oe, ina he haalele io ko'u ia oe elike me ka mea i hoikeia mai ia'u Ua kauoha ia mai au e hoi hou aku i ^epania no ka lilo ana i alakai nui no na koa aupuni no ka nee kaua ana aku maluna o na powa e holapu la maluna o ka aina, aole wale nohoi ma ka aina, aka, maluna o ka moana kekahi. Ua hoomaopopoia e ka Moiwahine o ka aina ame kona mau kuhina ame kona poe alakai apau o loko o ke aupuni, aohe kanaka e ae e holopono ai na hoonee ana aku i na hana e kinaiia ai keia mau holapu weliweli ana a na powa, owau wale no, o keia keiki au. Aka, ke ku nei nae au a noonoo no keia mea, oia hoi; o ko'u haalele iho ia oe a ho'i hou aku au i ka aina a'u i hele mai ai, a i ole, o ko'u noho iho papa e kiai a malama ia oe, e ka makua. "Eia nae, ua hoike mai nei oe i kou manaoio maoli imua o maua, e ae mai ana no oe ia maua e haalele iho ia oe, a e hele aku maua no ka hooko ana i na hana ku i ke aloha hoa kanaka. Nolaila, eia ko'u manao ma keia wahi, oia hoi, owau hookahi ke hoi hou aku ana no Sepania, a o ka'u wahine, ka Lede Evalina, oia ke noho iho me oe, a oia kou mea nana e kiai e ko maua luaui makuakane. A ke manao lana nei no au, e ae maikai mai ana noo Evalina i keia manao o'u." Ia wa i pane mai ai o Evalina i kana kane, ia Roderigo i ka i ana mai: "E ka'u aloha, ua ike no oe, aohe hiki ia'u ke kaawale mai ia oe mai; aka, mamuli nae o kau kauoha i hoike mai la. imua o ka makuakane nei o kakou ke haawi aku nei au i ko'u ae ana, owau ka mea e noho pu iho me ka makuakahe nei o kakou, ina nae oia e ae ana, ia mea. Ia wa i huli ae ai o Masana me kona mau maka i hele a piha i na waimaka e haloiloi aia, a pane aku la oia ia Evalina:

E kuu kaikamahine, aole oe he kaikamahine na'u mai loko aku o ko'u puhaka, aka, he kaikamahine oe mamuli a ka berita hemolele i hoopaaia ai mawaena o ka mea i oili aku mai ko'u puhaka aku ame oe, e kuu kaikamahine. Aka, ma kekahi ano no nae, he wahi pili no ko'u ia oe ma • 0 kou luaui makuakane la, ke kane hoi a ka wahine i hala aku i ka po. A e hoolohe mai oe, e kuu kaikamahine. Mai haālele oe i kau kane, nokamea, o oe o ka wahine kekahi mea e pono ai kana mau hooikaika ana no ka pono o ka lehulehu. O oe ka anela kiai o kona mau po ame kona ao. O oe, o ka wahine, ke kerubima nani nana e hoohauoli i kona mau hora kaumaha a kaniuhu hoi. E lilo hoi oe, e kuu kaikamahine i ipukukui hoomalamalama i konamau alahele e nee aku ai me ka hoomanawanui. O oe ananei ka hoku alakai o kana mau hana apau ma kona hako ana me na enemi o kona aina hookama; nolaila, e kuu kaikamahine, mai nana mai oe ia'u, ka lehu e hoi aku ana 1 ka honua iloko o na la pokole loa. No kou punalua hoi, oia ka Lede Maganolia, ua holo a ua maopopo mua kona. alahele e nee pu aku ai oia me kana kane. E a'u mau kaikamahine, e hele aku olua ma na wahi e nee aku ai ka olua mau kane. No'u nei ua lawa au i na mea e pono ai ko'u mau Ia o ke ola ana aku. AOLE I APU.