Ka Naʻi Aupuni, Volume V, Number 27, 7 February 1908 — Haunaele ma Koloa. [ARTICLE]

Haunaele ma Koloa.

Ua loaa mai i Honolulu nei, he lono mai Kauai mai, e hoike ana, ua ala ae la he hoonaueue hoopaapaa pili i kekahi pono wai mawaena o na hui mahiko o Koloa, ame McBryde. O keia Wai e hoopaapaaia nei, he kaha wai ia e kahe twia mauka pono i

b Koloa, aka, ua loaa like no nae ka wai i na mahiko elua. I kahi wa, i ka hui o Koloa ka wai; i kahi wa hoi, i ka hui o McBryde. E kala wale no nae i kawowo ai ka honene mawaena o keia mau mahiko no ka mea i kuleana oiaio i ua wai la; akahi no nae a kupono ae la ke koi' kuleana maoli ana a kela ame keia mahiko no ka mea ma oli o laua i kuleana. Aia ke ku kiai la ma ua kahawai nei, he 100 a 200 poe paahana i oleloia ua lako pono me na mea eha, mai kela a mai keia mai o ua mau mahiko nei. Ua makaukau na aoao elua me na niho oi ame na puupuu hao, pela ka lohe, ku ka po, ku ke ao e noke la keia poe i ke kiai. Ua hoouna aku hoi ka Makai Nui Raiki o Kauai i poe makai e kiai a kinai aku i ka haunaele e ulu koke ae ana.