Ka Naʻi Aupuni, Volume I, Number 143, 12 May 1906 — KA Moolelo Hawaii Kahiko. [ARTICLE]

KA Moolelo Hawaii Kahiko.

(ANCIENT HISTORY OF HAWAII.) Hoomakaukauia e J. M. Poepoe no KA NA'I AUPUNI. MOKUNA III. Ka Moolelo o ko Wakea ma Noho ana ma Kalihi-– Ka Loaa ana o ke Akua Ulu o Kameha'ikana. Oiai o Haumea e uhau ana i keia pule, aia na hua pule ke oni kapalili 'la i ka waha me he oni ana la na ke alelo lalapa o ka uwila; a aia kona mau lima ke ki-paipai 'la ma na aoao apau o ua pohaku nei. I kela a me keia manawa ana e kipa'ipa'i ae ai i ua pohaku nei, e onioni ana ia me he luliluli ana na ka lala laau i koanianiia e ke ahe lau makani. A ke nana aku nei o Kaliu i keia kupaianaha nui e lawelawe kamahaoia mai nei e ka wahine malihini, ka mea hoi ana i koho wale iho ai iloko ona, he wahine oiwi kino papa-lua no ia ana e ike aku nei; a nune pihoihoi wale iho la no ia iloko o kona noonoo iho: "He keu ka hoi! aole au i ninau aku nei i ka inoa o nei wahine malihini, e maopopo ai la hoi ia'u kona ano. O ko'u inoa ka kela wahine o ka ninau ana mai nei; a hoike aku nei no hoi au i ko'u inoa! a naaupo loa ihola hoi au i ka hoomaka e ole ana 'ku i kona inoa." Oia hele no ia o ka pule a ua Haumea (Papa) nei a pau; o ka hemo ae la no ia o ua pohaku nei; a olelo mai la oia ia Kali'u: "Aia a mahope hoike aku au ia oe i ko'u inoa. Aia hoi a pau ka papaia-awa ana a kaua. A ke ike mai la no oe i ka pohaku imi wai a kaua. E nou au iaia nei a e nana aku oe a ka ehu o ka wai i ka oili pulelo i ka lewa. I naue auanei ka honua a haalulu me he hooniia ana e ke olai, e manao iho oe ua puka ka wai. A mamua nae o kuu nou ana 'ku iaia nei, e kii aku oe i ka awa o kaua. He eleu wale la nohoi ka Kali'u a loaa ke kanoa awa o laua a lawe mai la a ma kahi a Haumea e ku ana. I kela wa, hookomo aku la o Haumea i kona lima akau malalo o ua pohaku nei, me ke kahea ana iho: E Kane-i-ka-pohakaa–e! E ala! E Kane-lu-honua–e! E ala! E Pohaku-o-Kane–e! E ala! Ia pau ana no o keia kahea ana a ua o Haumea, o ka oni ae la no ia o ua pohaku nei, oia no oe o ka oni ana a ka mea kino ola. He imo ana iho na ka lau lihilihi o na maka o Kali'u, pa ana keia makani ikaika; a pakele ua wahi kanaka nei mai olepe pu ia e ka makani, a ke lohe nei hoi ko Waikahalulu ame koia mau kaiaulu apau i nei mea halulu e oni nei iloko o ka lewa; aole i liuliu mahope iho, naue ana ka honua a naka haalulu ae la, me he mea la ua hoonaueia ka honua holookoa e ke ola'i, a uina pahu ana kekahi mea. He wa pokole wale no, ua ike aku la o Kali'u i ka pii ana ae o kekahi ohu: pohina mai kahi kahawai ae o Waolani a hala iloko o ka lewa. Ia wa i olelo mai ai o Haumea i ua wahi kanaka nei. (E HOOMAUIA AKU ANA.)