Ka Naʻi Aupuni, Volume I, Number 86, 7 March 1906 — KA MOOLELO O Hiiaka-i-ka-poli-o=pele KA WAHINE I KA HIKINA A KA LA, A O KA UI PALEKOKI UWILA O HALEMA'UMA'U [ARTICLE]

KA MOOLELO o Hiiaka-i-ka-poli-o-pele

KA WAHINE I KA HIKINA A KA LA, A O KA UI PALEKOKI UWILA O HALEMA'UMA'U

Huli mui no o Hiiaka a ninau mai la i ke aikane: ''E! Pehea kuu pule?" Pane aku la no hoi o Wahineomao: "Ua holo lea no ko pule e ke aikane. Aohe wahi pilikia o ko pule. Ua maikai mai ka mua a ka hope. Alaila, pane mai la o Hiiaka i ke aikane: "Helu ekolu ka kaua maikai; a ekolu ko kaua lanakila maluna o ka make. Elua a'u mau pu le i koe; alaila, pau pono ke kua lima. Ia wa uhau hou iho la ua o Hiiaka i keia pule ma ke paeaea ana: KAU HOOKAHI HANERI AME EWALU O KA MOOLELO O HIIAKA. 1 Ke hooulu nei au, e Kaneika polei 2 Imua i o ulu kini o ke akua, 3 Ulu mai o Kane o Kanaloa 4 O Hiiaka au la, o ke kaula, o ke kahuna 5 Nana i hana, nana i hooulu, 6 A hooulu au i ke ola, a he ola no 7 He ola hoi kou, e Lohiau-ipo i Haena 8 A oia hoi—He ola 9 He ola nui, he ola iki 10 He ola a kulia i ka nuu 11 A ola oe, e Lohiau-ipo 12 I—e! Holo—e!! Pau no keia pule a Hiiaka, huli mai la no ia a ninau mai la i ke aikane: "Pehea kuu pule?" Pane mai la no hoi o Wahineomao: "Maikai no ko pule e aikane. Ua holo pono mai ka mua a ka hope." Alaila, olelo mai la o Hiiaka i ke aikane: "Paa kauna o ka maikai ia kaua. Hookahi kauna pule a kaua no ke ola. O ka mea i koe, o na wai ola a Kane ma laua o Kanaloa. Aka, hookahi nae a'u pule i koe, alaila, kualima kaua i ka pule. O keia ka pule hope, pale ka wa mua, a hoomaka ka wa hope no ka wai." Huli aku la o Hiiaka a kamailio aku la ia Pauopala-a: "Apopo, ea, kii oe i ka wai hua a me ka wai lani. E hele aku oe a kamaaina o keia wahi, nonoi aku oe i mau po'i pohue hou loa a me na huewai ihi-loa. Alaila hoihoi mai oe ia mau mea

i ka hale nei, a na'u hoi ia e hana aku. Ua pau ka kakou hana o keia po." Ia wa, kahea iho la o Hiiaka i ka uhane o Lohiau: "E Lohiau-ipo i ka pali o Haena—e! Pehea oe?" Pane ae la no ka uhane o Lohiau: "Ua palekana au. Moea no imua, e ka wahine. Hoomanawanui ia " "Ae," wahi a Hiiaka i pane iho ai me ka hoomau ana aku i ke kamailia ana: "E hoomanawanui aku ana au ia oe. Aole e pau kuu aho a ola no oe ia'u." I nei wa i uhau iho ai o Hiiaka i ka pule hope ma ka paeaea ana no: KAU HOOKAHI HANERI AME EIWA O KA MOOLELO O HIIAKA. 1 E Lono! E Lono!! 2 E Lono ku lani 3 E Lono noho i ka wai 4 O Houlu oe, o Inana oe 5 Ho-inana ana i ke ola 6 Hopuepue ana oe i ka wai 7 I ka wai e ola a Kane 8 I ka wai hoi— I ka wai ola a Kane 9 Ka wai ola a Kanaloa 10 I ka Hikina, i ke Komohana 11 I wai hua—I wai lani 12 I—e. Holo—e. Moe iho la lakou nei ia po a ao ae, ua hooko aku la o Pauopalaa i ke kauoha a Hiiaka i haawi aku ai iaia no na wai elua na po'i hou elua, a me ka huewai ihiloa. Emoole no hoi ia hele ana'ku a Pauopalaa, huli hoi mai la oia me na mea a pau [Aole i pau.]