Ka Naʻi Aupuni, Volume I, Number 75, 22 February 1906 — KA Moolelo Hawaii Kahiko. [ARTICLE]

KA Moolelo Hawaii Kahiko.

(ANCIENT HISTORY OF HAWAII.) Hoomakaukauia e J. M. Poepoe no KA NA'I AUPUNI. MOKUNA I. Na Kuauhau Kahiko e Hoike ana i na Kumu i Loaa ai ka Pae Moku o Hawaii nei. Hulihia ke au, ka papa honua kona moku Hulihia, kulia mai ka moku o Kahiki, Aina no Kahiki ka La Aina hoowalia e Haena-mea Hoomoe aku la Kahiki-ku Kulapa mai kaulu wela O mai ke ahi Keehi aku la na kapuai — Kapuai akua no Pele Ke keekeehi wale la i ka Lani Haule uina i Polapola Noho i ka lau-haa o ka moku Hina kukulu o Kahiki Hina ka omuku i ka makani Ka newenewe opua i ke kai Ea mai ana ma Nihoa Ma ka moku mai o Lehua Ea mai ana ma Kauai a ma Oahu Molokai, Lanai, Kanaloa, ( Kahoolawe keia. L.H.) Maui Hawaii, Ka wahine o Pele I hi'a i a kana ahi a-a Pulupulu kukuni wela ka lani He uwila kukui no ka Honua Hekili paapaaina Opa'ipa'i wale ai ka mauna Pipili ka lani paa ia moku Nalo Hawaii i ke ahi a ka wahine. Oiai kakou i ike ae la i na manao o ko kakou poe kupuna kahiko e pili ana i ke Kumu mua ana o ka aina ma keia wahi o ka Moana Pakipika, ame ka loaa ana mai o na mokupuni o Hawaii nei, he mea pono ke nana kakou i na manao koho wale o na poe naauao. "E imi kakou i ka manao o ka poe naauao," wahi a ka "Moolelo Hawaii" i hooponoponoia ai e Rev. F. J. Pokuea (1858) a penei ko lakou manao. Aole paha aina maanei i ka wa kahiko loa; he moana wale no. Manao lakou, ua hoea mai na aina mai loko mai o ka moana; a o na ahi pele ka mea i hoea mai ai. Eia ka mea i manao ai lakou pela; ua ikeia kekahi mau moku i hoea mai, a ua like ke ano oia mau aina me Hawaii nei. Eia ka mea akaka loa, he aina pele wale no keia pae moku a pela nohoi na moku apau ma keia moana; o na pohaku apau, he pohaku i hoohehee wale ia no; aole i like na pohaku me ko na aina puni ole. (E HOOMAUIA AKU ANA.)