Ka Naʻi Aupuni, Volume I, Number 67, 13 Pepeluali 1906 — O ka Eha a ke Aloha e Lalawe Nei! HE MOOLELO NO, KAMEHAMEHA I. Ka Na-i Aupuni o Hawaii. KA LIONA, A I OLE, O KE PUKONAKONA O KA MOANA PAKIPIKA. [ARTICLE]

O ka Eha a ke Aloha e Lalawe Nei!

HE MOOLELO NO, KAMEHAMEHA I.

Ka Na-i Aupuni o Hawaii.

KA LIONA, A I OLE, O KE PUKONAKONA O KA MOANA PAKIPIKA.

13. O ke kini hoi i ke kiekie 14. Oia hoi i ka haahaa 15. Ua lu ia, ua helelei, ua hune, ua nalo, ua make 16. Ua pepehu wale kana wahine—e, 17. Ke ku la na alii elua 18. I ka hale i ka poupou make 19. Ka hale make ia lakou; 20. Ka hale ola iaia nei 21. Auhee ia lakou la 22. Ka lanakila iaia nei. 23. Ua hehee ka aina he alii make 24. He malama ai nei o Hoku 25. Ua o mai i ke kuhiwa-uli ohu, 26. Ulu kama-ehu, owela ula, wela ka lani 27. Ua haoa ka lani, ua kama e, 28. Ke kau nei ka omea lani 29. Ka omea lani Nakoko 30. Maea ke ao, mahana, koe hana ka po 31. Ua maea lani, owela ke kuahiwi 32. Ua koi opua, koiawe na mauna, 33. Ua lele ka hoaka o ka aina 34. Kau ka neo o ka uhane o ka moku aia iluna 35. Ua ikeia na iliili a Palila 36. Ua hooleiia i kahi make e Kau, *** *** *** Ma ka mea hoi e pili ana ia Kapiolani i hoikeia ae nei, oia no ke aliiwahine kaulana o Hawaii nei nana i a'a aku e paio i ka mana o Pele ka wahine o ka Lua. O na huaolelo a Kapiolani i a'a aku ai ia Pele ma ka malama o Dekemaba 1823 paha, (wahi a ka Papa Kuhikuhi Manawa a S. M. Kamakau, oia kekahi o na olelo kukala alii kaulana loa a nei wahine, i kiolaia ai e kona mau makua iloko o ka na- helehele, elike me ia i hoikeia ae nei. Ma keia malama a ma keia makahiki i iho aku ai ua aliiwahine nei no lalo o ka lua o Pele, a hoopuka aku la i keia mau huaolelo: "O Iehova, ko'u Akua, a Nana i hana i keia ahi ai-honua, nolaila, aole o'u maka'u ia oe e Pele. Ina wau e make ia oe e Pele, i keia manawa ano, alaila, e manaoio oukou e kuu mau hoahele ia Pele. Ke hilinai nei au ia Iehova, a Nana au e hoopakele mai ka uhaki ana i ke kapu ai-ohelo papa me ka ikemaka o ko'u mau hoa makaainana nei. Ke make ole au iaia ano, alaila, e hilinai oukou ia Iehova, oia ke Akua Kiekie loa iloko o ka lani ame ka honua. Aole o keia ahi Pele hiki ole ke lele iluna o ka lani me kona mana iho." (E HOOMAUIA AKU ANA.)