Ka Naʻi Aupuni, Volume I, Number 22, 21 December 1905 — Ka Ipu Alabata. [ARTICLE]

Ka Ipu Alabata.

He mea pono e heluhelu ia keia me ka hoomaopopo pono loa ia e oe, e ka mea e heluhelu ana i keia mau manao. Ka mua. Ua ike ia o ka Lahui Hawaii opio o keia au hou e nee nei, aole loa i paa ia lakou ka moolelo o ko lakou lahui iho. Nokeaha mai ke kumu o keia hemahena o keia au hou e nee nei? Hookahi wale no haina; ua nele maoli no kakou i ka moolelo e apo koke mai ai la hoi na opio o ka aina, i lilo ai lakou he mau lua huna waiwai e hoomomoa ia ai ka moolelo aloha o ko kakou aina kulaiwi nani. Ka lua. Oia no ka hemahema maoli o na opio Hawaii o keia hou i ka lakou olelo makuahine; a ua ku maoli no hoi i ka hilahila ke hoolohe aku i na opio e hoao ana e olelo i ka olelo kulaiwi me ka hemahema. O ka oi loa aku, ke hoolohe aku oe ia lakou, na opio e hoao ana e olelo Beritania, aole no i hemo pono loa ka hoopuka ana i ka olelo Beritania, a he hooku'iku'i no ka manao, aole he mohala pono. Nolaila, ina pela iho la ka lahui opio e epa ia mai nei, ua maopopo loa, aole e ulu ae ana he lahui Hawaii, aole no hoi he lahui Beritania, wahi a Poha-

kuhauoli i olelo ai: "Aia ka naauao io o ka lahui o kekahi aupuni a paa na moolelo o kona aina kulaiwi iaia." A o ke kanu mau ana aku o ia moolelo iloko o ka opio a kanaka makua wale ae oia, he hoomau ana aku no ia i ke aloha mawaena o ka hanauna hou a me ka hanauna i nalo aku, a e nalo aku ana hoi ma ka welelau komohana o keia ola ana. Ua olelo ae o Hoapililoihi (Longfellow) he mea pono ma ka nee ana imua me ke au o ka manawa "E waiho iho i hailona ma ka pu'e one o ke au o ka manawa i loaa ai ka ike i ou mau hoa e nee mai ana, he alahele no keia ua hele mua ia, a loaa no he kupaa ana no ia nee ana aku imua." Eia KA NA'I AUPUNI ke nee aku nei imua me ka moolelo o Kalani Nui Kamehameha I. He moolelo oiaio loa o kona ola ana a me kana mau hana kaulana e haaheo ai kona lahui. He haneri wale no kope i koe e paa nei ia makou o ka Helu 1 a hiki i keia helu e puka aku nei i keia la. E Hawaii e, i aloha oe i ko aina ano ka wa e hoouna mai i kau kauoha pepa me ke ola o ka pepa, o nele i ka Ipu Kukui Alabata e malamalama ai ko ka hale a pau.