Ka Nonanona, Volume IV, Number 24, 18 March 1845 — Page 112

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." SOLOMONA.
Buke 4. HONOLULU, OAHU, MARAKI 18, 1845. Pepa 24.

NO KA NOHO MARE ANA. HELU 3.

                Ina i ae ke kane a me ka wahine i ka berita mare, ua paa loa no laua, aole hiki ke hemo hou ae. Nolaila e noonoo oukou, e ka poe mare, i ke ano o ka berita mare, a e hoomaka pono i ka noho mare ana. Ina aole hana oukou me ka noonoo i ka mua o ka noho pu ana, e hiki koke mai paha ka like ole o ka manao, a ku e, a pono ole. Pela no na mea mare o Hawaii nei he nui loa. Aole liuliu a ku e ka manao o kekahi i kekahi, aole oluolu. Hoole ka wahine i ka manao o ke kane, a hoole ke kane i ka ka wahine ku e. Aole makau koke laua, a hoomanao i ka hope, a hoopau koke i ka huhu; nolaila komo mai ka enemi i ko laua hale, a haunaele. Ina noho makaala laua mai ka mua mai, a kipaku koke i ka huhu, ina ua pakele laua i ka poino ma ia hope aku.
                Aole paha pela ka hana ana ma ko Hawaii nei. Aole kipaku koke ia keia enemi, nolaila, nui ke ku e a me ka hakaka a me ka hana ino. Ina hele ke kane ma kahi e, a hoi mai, lili no ka wahine ia ia, a hoino, a pela no ke kane i ka wahine. Lilo no ka ai a me ka ia i kumu o ka hakaka. Hoohewa kekahi i kekahi; a huhu, a pakike, aole malu ka hale, aole oluolu ka noho pu ana; a lilo keia ku e ana i kumu o ka moe kolohe, a me na hewa e ae he nui loa. Hihia no kekahi poe ekalesia ma keia hana.
                E noonoo oukou, e ka poe mare i ke ano o keia olelo; E lilo laua elua i hookahi.
                1. I hookahi ka hale e noho ai. Aole pono e noho kaawale ma na hale okoa; e noho pu, i hookahi ka hale, i hookahi ke keena moe, i hookahi ka ai a me ka ia. Aole pono e kipa pinepine ka wahine ma na kauhale; e malama no ka wahine i kona hale iho, a imi i na mea e oluolu ai ke kane; a pela no ke kane, aole noho kaawale, e launa mau i kana wahine.
                2. I hookahi ka wiawai. I ka mare ana, ua lilo no ke kane a me ka wahine i hookahi, nolaila, e pono e hui pu ia ka waiwai i waiwai like ai laua elua, aole imi okoa ke kane i kana waiwai iho, a imi okoa ka wahine i kona waiwai iho, aka, e imi pu, a e ai pu i ka waiwai. O ke kane no ka mea malama nui i ka waiwai, no ka mea, oia ke poo; aka, o ka waiwai, oia ka mea e pono like ai ke kane a me ka wahine, a me na keiki.
                3. I hookahi ka manao. Eia ka mea nui, ka mea e oluolu nui ai ka noho pu ana. Nolaila, e pono ke ae oluolu aku ka wahine i ka manao o ke kane, a pela no ke kane i ka manao o ka wahine, i oluolu. Ina i komo mai ka manao ku e ma ka naau, e hoopau koke, mai hoopuka aku ma ka waha, a hakaka. Ina aole ku e ka manao o ke kane i ka pono a ke Akua i hoike mai ai, e pono no i ka wahine ke hoohalike i kona manao me ko ke kane; pela no ke kane me ko ka wahine, i like pu ka manao, i manao aloha laua kekahi i kekahi, i manao makemake,