Ka Nonanona, Volume IV, Number 23, 4 March 1845 — Page 111

111 KA NONANONA. (MARAKI,

paina. Ua hanaia hoi ia mau lole ma Amerika Hupuia, aole nae he maikai loa kolaila mau lole e like me ko Farani a me ko Beritania.

LOKOINO LOA.

                Ua lohe iho nei au ia Kilakau, i ka lokoino o na kanaka ma Mahukona i Hawaii; eia ka lokoino, he waapa no Lahaina, holo i Kohala e kuai akaakai, puaa a me kela mea keia mea, a manao ka mea nona ka waapa e hoi i Maui; loaa koke ia ia ka ino ma Mahukona, a pilikia loa; kahea aku ia i na kanaka iuka, "e hoopakele ia makou; e hookele ia makou," o ka nana wale aku ka na kamaaina, aole kii aku e hoopakele; a pakele ka waapa i ka hooikaika ana o ka poe maluna iho, pae iuka, pau kekahi waiwai i ka aihue a me ka hunaia.
                Pehea keia? Ku i ke aloha anei? Ku i ke kanawai gula anei Mat. 7: 12? Kainoa e aloha kakou i ka poe pilikia, a me ka poino! eia ka he aihue i ka lakou waiwai! E ko Mahukona, pehea keia hana a oukou? he oiaio anei ka lohe o makou?

MAKE I KA AHOLEHOLE.

                Iloko o Feb. iho nei, make kekahi kanaka, o Huhu kona inoa, ma Kaloko i Kona, Hawaii, i ka aholehole. Hele oia i kai, hoohei i ka ia, nahu iho la, a paholo ka ia iloko o kona puu. Hoolualuai iho la ia, aole hemo; lalau ia i ka laau, hou iho la iloko o kona puu, aole nae i hemo i kona hou ana. Nui loa iho la ka eha ma kona puu. Ike kekahi poe ia ia, a nao koke kekahi, aole pakele; o kona make no ia. E nana kakou i keia make: no ka nahu naaupo i ka ia. E ao o make hou kekahi malaila.

KA MANAO O NA KAHUNA POPE MA FARANI.

                Eia ka olelo a na kahuna pule pope ma ke aupuni o Farani. "Aole pono e aoia na makaainana i ka heluhelu palapala Hemolele. Ina loaa ia lakou ka palapala iloko o ko lakou mau lima, alaila e hoowahawaha lakou i ka makou ao ana (ka na kahuna pule) aole hoolohe mai. He pono e waiho i na makaainana iloko o ka naaupo, e noho ike ole e like me ka wa kahiko, oia ka pono." Pono anei keia?

MAI PONO OLE.

                Ua mai loa o Mi. Napa, ma Honolulu nei i keia manawa; aia ma ke akemama kona mai; i ka nana'ku, o kona hele aku koe e ike i kona Haku, a me ko ka lani puali. Lana no nae kona manao; ua oluolu loa i ka hele aku.

NA MAKUA.

                E nana pono i kela olelo a Halai; he oiaio ia olelo. Poino loa na keiki auana wale ma keia kulanakauhale.

PAI HEWA.

                Ua oleloia ma kela pepa mamua, ua kipakuia o Kapuaa noloko ae o ke Kulanui; ua hewa ia. Aia no ia iloko o ke kula e noho nei, me kau wahi hihia nae.

NA HOOPII.

                Ua lohe iho nei makou, aia no o Rikeke laua me Haalilio ma Bosetona, i ka la 26 o Aug. 1844; ua kali laua malaila i ka moku e holo mai ana i Hawaii nei. O ka hiki mai koe paha o laua; e lohe auanei kakou i ke kani ana o na pu.