Ka Nonanona, Volume IV, Number 23, 4 March 1845 — Page 110

1845,) KA NONANONA. 110

mai o Paulo, "mai hoopili ano e ia oukou me na hoomaloka." Heaha ka manao hookahi ana o Kristo me Beliala? heaha hoi ke kuleana o ka mea manaoio me ka mea hoomaloka?" Ina i makemake kekahi i ke Akua, a noho haipule, a makemake ole kekahi i ke Akua, a ku e ia ia, a malama ole, pehea e lilo laua i hookahi? Aole malama laua i ka Haku hookahi, nolaila, aole pono ke hui pu ma ka mare ana. Aole paha e hoomaikai mai ke Akua ia laua ke mareia, aole oluolu ka noho pu ana. He mea ia e palaka ai ka mea manaoio, he mea e hihia ai. A i like ka manaoio a me ka haipule, alaila, pono ke mare.
                Auhea oukou, e na kane, e imi wahine, a me na wahine e imi kane, e noonoo oukou i keia mau mea elima. Mai wikiwiki ke koho ana, a hoopili ano e kekahi i kekahi. E hana naauao i pono ko oukou mare ana, i pomaikai ko oukou noho pu ana.

INU UALA.

                Ke lohe nei makou, he nui ka inu uala awaawa, ma Kona Hawaii i keia wa: aole pio ia hewa i ke kanawai. Nolaila, he ona, haunaele, a me ka hana ino ma ia wahi, a ua haalele kekahi poe i ka aoao o ka pono, a lakou i malama'i mamua.
                Pehea keia? E ke Kiaaina, e na lunakanawai, na makai a me ka poe koikoi a pau ma Kona, ke ninau aku nei ka Nonanona ia oukou, pehea keia haunaele? Aole anei palaka oukou? Auhea ko oukou ikaika i ka hoomalu? Ina i lanakila kela ino nui, aole anei ili ka hewa maluna o oukou? Make hewa ka pahikaua o ke kanawai. (Roma 13: 4.) ia oukou, ke loaa ole ka malu. E eu mai paha oukou, a e nana hou i ke kanawai aoao 152, penei:

KANAWAI HOOKAPU I KA HANA ANA, A ME KA INU ANA I NA MEA ONA.

                I ko makou imi ana i na mea e pono ai ke aupuni, ua maopopo ia makou, o ka hoomahuahuaia o ka ai, oia kekahi mea nui. Ina wi, ua poino loa ka aina ilaila.
                Ua oleloia mai i keia manawa ua wi, a ua imi makou i ke kumu. Eia kekahi mea i loaa ia makou. Ua laweia na mea ai, o ka uala, o ke ko, o ka ipu, a me na mea e ae, a ua hooliloia i mea ono, a noho wale na kanaka me ka hana ole, no ko lakou moe mau ana ma ka ona: nolaila, ua nahelehele ka aina, a ua ilihune hoi. A no ko makou makemake e malu, a pomaikai ke aupuni, noloila, ua akoakoa makou e noonoo, a ke kau nei i keia kanawai.
                I. Ina i lawe kekahi kanaka i ka uwala, a i ke ko, a i ka ipu, a i kekahi mea ai e ae, a hoolilo i mea ona, a inu iho, alaila, e hooukuia oia, i hookahi dala, a ina hana hou oia pela, elua dala ka uku ana, i kela hana ana, a i keia hana ana, a hiki i ka nui loa.
                II. Ina i hana kekahi i na mea ona, e like me ka olelo maluna, a hoohainu ia hai, e hooukuia oia e like me ka olelo o ka pauku akahi o keia kanawai.
                III. O ka mea inu wale i na mea ona, e like me na olelo maluna, oia kekahi e pili i keia kanawai, a e hooukuia oia e like me ka mea nana i hana.
                IV. Ina i hooukuia ke kanaka e like me ka olelo maluna, a nele oia i ke dala, ma ka waiwai e uku ai, a ina i nele i ka waiwai, alaila, o ka hana ka uku, e like me ka hana i kupono i na dala i oleloia, a i ole e hana, e like me keia olelo, e hoopaneeia'ku ka uku, a i ole ia, e paa i ka hao.

NO NA MEA AAHU.

                O na lau a me ka ili laau na mea mua e aahu ai kanaka, a he ili holoholona kekahi mea aahu. A hala kekahi mau haneri makahiki paha a naauao iki kanaka, ua hanaia ka lole i mea aahu. Ma na aina naauao, he nui wale na hale hana lole, he hale hili kekahi, a he hale kakau kaliko kekahi. Ma Beritania a me Farani na lole maikai loa, na kaliko paina, a me ka lole hulu hipa.