Ka Nonanona, Volume IV, Number 23, 4 March 1845 — Page 108

1845.) KA NONANONA. 108

                Oia la, ka Nonanona, haina'ku.
                Na kekahi o lakou nei i kakau.
L. KOLONA HALAI.

HE LUAWAI HOHONU.

Kohala, De t., 5, 1844.
                Auhea oe, e ka Nonanona;
                Ke hoakaka'ku nei au ia oe i wahi hana hou a me ke akamai ma Kohala nei. Aia no ma Kahei kahi i hanaia'i ua hana nei. Akahi no a paa. Akahi hoi a olioli kolai la i ka wai aiai a me ka ono.
                I ko Mi. Bele noho ana ma Kohala nei, paipai aku la kela i ko Kahei e kohi i punawai no lakou iho, a kuhikuhi ae la no hoi ia i wahi e kohi ai, aia no, kokoke i ka papohaku o ke kulanakauhole, he 1/2 paha o ka mile mai kahakai aku. Kohi iho la lakou a me ko kau wahi e kekahi pu me lakou, a loaa ia lakou 5 anana o ka hohonu, a o ke oki ana no ia, no ka loaa ole o ka wai, a nolaila hoi ke kanalua a me ka molowa maoli no paha kekahi.
                Pela ke ano o ka hana i ko makou hele ana mai, e noho maanei. Ua ike au i ka lua, i ko'u kaapuni ana, a nolaila hoi hooeueu hou aku la au ia lakou, i hoomanawanui lakou a loaa ka wai. I aku au i ke konohiki o ia wahi ia Naiwi, he oiaio no e loaa ka wai ia oukou ke hooikaika iki hou ia, aka, paa loa lakou i ke kanalua a i ka hoomolowa a hiki i kela mau malama i hala iho nei. Ia manawa hoomaka hou ae la lakou i ka hana, a kohi ilalo a hiki i ka 9 o ke anana, a loaa iho la ka wai maoli, ono loa no! Ia la iho ua maopopo 2 1/2 kapuai ka hohonu o ka wai, aka, aole nae i pau ka hana. Aia no ke kohi la ua poe la, i hookahi anana hou aku, i nui loa ka wai a i mau loa no hoi. A ina he 10 anana ka hohonu, ina hoi hookahi anana ka hohonu o ka wai, a keu aku paha, no ka mea, he wa ua ole keia ma Kohala nei. Maloo loa ka aina a pau.
                Eia ka hana e koe, a paa ua hana maikai la. E hoonoho i na pohaku mai lalo a iluna. A paa ia o ia huila paha ka mea hope, i mea e huki mai ai ka wai. Hohonu loa ka lua i ko nana aku i keia manawai. Ua ike maka au.
                Mai ko lakou mau kupuna mai, ua noho ko Kahei me ko na moku aina e ae, he nui wale maanei, iloko o ka pilikia nui no ka wai ole. Eia no ka lakou mau mea e inu ai, mai ko lakou hanau ana mai. O ka waikai pono ole, a me ka ua i loaa mai iloko o no uliilii a me na haona, me ka papawai. I ka wa ua, aohe nae he nui ko lakou pilikia, aka, a oki ka ua, 6 paha mile 8 paha ko lakou hele ana i wai inu no lakou iho. Aka, ma keia hope aku e olioli lakou i keia haawina, aneane lua ole, mai ka Haku mai, oia hoi i ka wai ono he nui wale.
                I ko'u ike ana, ua lehulehu ka poe e pii ana i wai no lakou iho a 8 paha mile a 10 paha iuka! No na mokuna kahawai ole lakou. He hana luhi, ka! Pono no ke hana ko kela kulanakauhale wai ole ko keia kulanakauhale wai ole i puna wai no lakou e like me ko Kahei.
                Mai inu mau ko Hawaii nei i waikai ono ole, a i ua no hoi mahope mai o kona lilo ana i mea hohono a me ka hoopailua, no ke ku ana a liuliu iloko o ka huewai! Mai kanalua, mai hoomolowa no hoi, ea! no ka mea, e loaa no ia oukou ka wai maoli, i na wahi a pau, ke kohi oukou ilalo, e ko na wahi wai ole!