Ka Nonanona, Volume IV, Number 23, 4 March 1845 — Page 107

107 KA NONANONA. (MARAKI,

pala a makou, ala koke oe, a manao a hoomaopopo, a malama ia lakou, me ka hoonoho ana ia lakou malalo iho o na kanawai pono a pau a ka makua i kau ai maluna o lakou, i mea e malu ai lakou, alaila paha pau ko lakou hele ana mai, a me ko lakou hana ino ana ma keia wahi, a me ko lakou hoopaiia maanei.
                A, no kou malama ole e Hawaii i kau mau keiki; a me ko lakou hana ino ana maanei, nui ke kaumaha, a me ka ehaeha o ko makou naau, no ko oukou malama ole ana i ka oukou mau keiki, a me ke ano e loa o ke kolohe o ka oukou mau keiki maanei, nolaila keia wahi manao paipai aku ia oukou me ke aloha no, aole me ka huhu ia oukou. A pehea la kou manao e Hawaii no keia palapala ana'ku ia oe? kaumaha paha? pono ole paha ea? no ka mea, o ka naau o na makua naauao a pau, o ko lakou naau ka i eha ke hewa ka lakou mau keiki.
                No ka mea, he waiwai nui ke keiki; ua oi aku ia mamua o ke dala, a me ke gula maemae i loaa ma kou mau lima, ke malama pono oe ia ia mai keia wa aku: no ka mea, ua ike no oe i keia wa e noho nei, o na keiki ka mea e lilo ai ke kanaka he alii, wahi a oukou, a o na keiki no hoi ka mea e pakele ai ka makua i na la paahao, a me ka poalima o na konohiki, a o na keiki no hoi ka mea e pakele ai oe, e ka makua, i ka auhau puaa o ka aina i ka makahiki, a me ka kookupu dala o ke kino, a oia na pono a ke keiki la, e ka makua i ae ia'i nou ma ke kumu kanawai o ke aupuni o keia pae aina o ko kakou alii, ma ka lakou ahaolelo ana. A no ke aha la hoi keia hoohemahema ana o oukou i na keiki e hele wale ma o maanei? aka, ua aneane like keia i ka oukou hana ana, me ka wahine e o ana i ke kui pine, ma kona kapa, a i kona hele ana, haule iho la ia a nalowale. A e aho iki no nae paha ia? ua huli ia, a ua mihimihi ia ia iho, aka, o oukou ea, aole oukou e imi, aole hoi i huli mai, no ka mea, na makou no i hooili aku nei, a ua holo hou mai nei no i anei i keia manawa, a ke aihue hou nei no. No ka mea, he poe keiki ku pono ole keia ia oukou, e na makua, ke hookuu a ke haalele wale aku ia lakou e hele wale ma kela wahi keia wahi, no ka mea, ai no lakou malalo o oukou e no makua i keia wa, a nolaila, mai ae wale aku oukou ia lakou, e hele ma ko lakou manao, a me ko lakou makemake iho.
                No ka mea, he poe akamai oukou e Hawaii i ke kiamanu, ua imi hoi oukou ma ia hana me ka noonoo i mea e loaa'i; huli hoi oukou i ke kepau, a me ka nana ana i ka lehua pono, kahi e kau pinepine ai na manu, a kapili hoi oukou i ke kepau malaila, i mea e pili ai, a e lou ai ka manu ma ia mea, a ua akamai hoi oukou i ka hana ana i mea e loaa ai ka oo a me ka mamo, no ka mea, he waiwai ma ko laua hulu. A no ke aha ka hana ole, a me ka imi ole i kepau e paa'i ka oukou mau keiki? a i mea e pau ai ko lakou hihiu, a me ko lakou lele ana ma ka lewa? a i noho pono lakou ma ko oukou mau alo, a i lako hoi lakou, a maona i ko oukou momona, a i kena no hoi ko lakou makewai i ko oukou waiu, no ka mea, ua hele ka oukou mau keik ma ka he o Maiahili, ma ka ea Maialoloa, a ua kau hoi lakou i Kapua mehe auwaa panana la.