Ka Nonanona, Volume IV, Number 23, 4 March 1845 — Page 105

105 KA NONANONA. (MARAKI,

Haku. I keia wa ke noho la no ia ma kona alo, he maka no he maka. Emi mau mai la konu ikaika, a i ka la 21 o Ianuari i hala ae nei, ike iho la ia, ua kokoke mai kona manawa.
                I ke ahiahi e noho ana no ia iluna, nana ae la i ko kona hale, olelo iho la "Aole a'u mea e ae e hana'i, eia wale no ka mea i koe, o ka hoomaikai i ka'u wahine, o ka hoomaikai no hoi i ka'u mau keiki, a e like me Iakoba, e opili ae i ko'u mau wawae maluna o kahi moe, a hoi aku i kahi e noho loa ai." Ko iho la hoi keia olelo ia po no. I ka hora 10 maule mai la oia, a pohala ae, i mai la ia "kuhi au la ua make, ua hoi hou mai nei no nae." Ninau aku la kekahi ia ia, "He oluolu anei kou manao e make koke?" ae mai la ia "ae." Ninau hou aku la, "Ua kokoke mai anei Iesu ia oe a ua maikai no hoi i keia manawa?" Ae mai la ia me ka ikaika "Ae, ua kokoke mai no ia, a ua maikai io." Alaha mai la ia i kana wahine a me kana mau keiki, a me na hoahanau e ku mai ana, a me kekahi poe haumana ka i malama mai ia ia i kona manawa mai. Pule pu makou me ia, a himeni no hoi, a pela makou i kiai ai a hiki i ka hora ekolu o ke kakahiaha, a hiamoe iho ia iloko o ka Haku. Ia po no, aole i kaa kona oni i ka eha, ku no kona mau helehelena i ka oluolu a me ka hauoli wale no. Ua hana e aku oia i kana hana, nolaila, aole i pihoihoi. Ua hoomoakaka e oia i kona kuleana iloko o ka lani, nolaila, ua malu oia i ke Akua ma o Iesu Kristo la. Ike no ia i ka oiaio o kela olelo ma ka Halelu XXIII.
                "Oiaio, ina e hele au ma ke awawa malu o ka make,
                "Aole au e weliweli i ka poino, no ka mea, o oe pu kekahi me a'u;
                "O kou mana, a me kou kookoo, o ka'u mau mea ia e oluolu ai."
                "Pomaikai io ka poe make, ke make iloko o ka haku, ma keia hope aku (he oiaio, wahi a ka Uhane,) e hoomaha lakou i ko lakou luhi, a ke hahai nei no hoi ka lakou hana ana mahope o lakou."
                Ke kanikau nei kana wahine a me kana mau keiki ia ia; o kona poe hoalawehana a me na misionari a pau kekahi, a o ke Kulanui no hoi ke kanikau nei, ke kanikau no nae me ka manaolana. Ia kakou i hooneleia'i, ua hoowaiwaiia'i kela; ua hele pomaikai aku nei ia i ka hale o kona makua ma ka lani.
                Kanu pu ia mai la kona kupapau me kana wahine mua a me kekahi keiki a laua. Malaila no e moe malu ai a kani ka pu a ka lunaanela o ke Akua i ke kakahiaka o ke alahouana.
                "E ake au e make i ka make ana o ka poe pono, i like hoi kuu hopena me kona."
                He paahana hooikaika o Dibela. Aole ia i waiho i ka hana no kona nawalewale: hoomanawanui no i ka hai ana'ku i ka olelo a ke Akua, i ke ao ana'ku i na haumana, a i ka hoomakaukau ana i na palapala e naauao ai ko Hawaii nei.
                Eia mai ua palapala i paiia, ana i kakau ai.
                O ka Hoikehonua o ka Palapala Hemolele.
                Huliano.
                Ka Mooolelo o na holoholona no na kamalii,
                Ka Ikemua.
                O ka Hoikemanawa a me ke Kuhikuhi no ka Mooolelo Hemolele.
                Ka Mooolelo o Hawaii nei.
                Hoike Akua.