Ka Nonanona, Volume IV, Number 22, 18 February 1845 — Page 108

1845.) KA NONANONA. 108

pope. Makemake makou ia aoao. Ina e huli oukou na'lii i kela aoao, lanakila makou, no ka mea, e kokua no ia aoao ia makou. Pela no ma Paniolo, me Kaliponia, me na aina pope a pau. Pela no hoi ko makou makemake maanei.
                1. E pau ka naauao.
                2. E pau ka olelo a ke Akua.
                3. E pau na sabati.
                4. E pau na kanawai.
                5. I keakea ole ia ke kolohe, aihue, apiki, haunaele a me ka makou oihana a pau, a e mahalo makou ia oukou.
                Na makou na ko oukou poe kauwa me ka mahalo.
                Na Hoowahawaha i ka pono; Hoomanakii; Hula Hiaka; Inurama; Inuuala; Inuawa; Moekolohe; Hooipoipo; Hakaka; Aihue; Hookamakama; Kipiikeaupuni; Pepehikanaka.
                Me ko makou poe hoalauna a pau ma na hale kuai rama me na hale hookamakama mai Hilo a Niihau.
Ianuari 1, 1845.

HANAI KAHUNA PULE.

                Eia na mea a'u i lohe iho nei.
                Kokua ko Wailuku mai Aperila a hiki Ianuari nei,                                                   $325.50
                I ka la 1 o Ianuarl nei kokua ko Hamakua ma ia Gelina i eke dala,                           131 00
                Kau inoa ko Molokai, e kokua i keia makahiki 1845,                                                 350 00
                I ka malama o Okatoba, kokua ka ekalesia mua o Honolulu i ka lakou kumu,       140 00
                I ka la mua o Ianuari iho nei.                                                                                         112 00
                Houluulu                                                                                                                     $1058.50
                He mea keia e hauoli ai ka naau o ka poe haipule; no ka mea, ua akaka, aole ma ka waha wale no ke aloha, ma ka hana ana no kekahi.

Kulahanai, Hilo, Dek. 26, 1844.
                Aloha oe e ka Nonanona.
                He wahi moni ka'u ia oe, he wahi gula nae. A nau no e auamo hele ma keia mau aina mai Hawaii a Kauai.
                Ke ike nei au ma Hilo nei, he laau waiwai loa ke kope, he laau makemake nui ia e na haole kuai, a me na Misionari no hoi, a me ka poe waiwai a pau.
                A nolaila ke kanu nui nei kekahi poe i ke kope, aole okana mai o ka nui o na mala a kekahi poe e kanu nei.
                Ke hooikaika nui nei na kanaka ma ke kanu nui ana ia laau waiwai o ke kope.
                Aole nae malaila wale no ka hana ana, ma ka mahiai maoli no kekahi, ka mahiai kalo, uala, a me na mea like.
                O ka poe molowa, palaualelo, holoholo wale ma na alanui o Hilo nei, hiamoe wale ma na kauhale, hele wale ma ka nahelehele e imi i na uhini, a me na mea a lakou i makemake ai malaila.
                Oia poe no, ka poe e olelo haanui ana penei; Ka! kai ka ulu o kau mala kope. Maikai ka ulu ana! I na hea nei ke kanu ana o kau mala kope?
                "I aku ka mea i kanu, mamua aku nei no la; i ka malama o Nov. aole no i liuliu loa.
                I hou mai ua poe molowa nei, palaualelo, holoholo wale ma na alanui o Hilo, hiamoe wale ma na kauhale.
                "Aole no he hikiwawe a koe aku, o ka ulu o kau mala kope; hikiwawe, aole hikiwawe a koe aku."
                Pela wale no ka poe palaualelo e olelo ai, a piha ko lakou waha i ka makani, a me ka haanui wale aku i ka hai.
                E! mai hahai kakou mamuli o keia poe. Aka, e hahai kakou mamuli o ka poe e kanu ana i ka hua ono.