Ka Nonanona, Volume IV, Number 22, 18 Pepeluali 1845 — Page 106

1845.) KA NONANONA. 106

Ian. 15, 1845. He mau kiko eleele loa keia poe keiki ma keia pae aina; aole pono e hookipa nui ia lakou; o ka hoomaka e ia lakou ka pono. Ua akamai a me ka ike kekahi poe o lakou; aka hoi, aole waiwai o ka ike ke huiia me ke kolohe.
                Oia ka mea e poho ai ke Kulanui, o ke kolohe o na haumana; hana hewa kekahi poe iloko o ke kula, a hana hewa kekahi poe i ka wa hoi iwaho. Inoino loa ko'u manao i keia poe, no ka mea, ua poho ka luhi o na kumu, ka waiwai laa mai Amerika mai, a me ka lokomaikai o ke Akua. I ko'u manao, he poe pookela keia ma ko Satana aoao; aole mea i aoia e like me lakou, a nolaila ko lakou ino loa.

                OLELO HOOHIKI. Eia ilalo iho ka olelo hoohiki i hoohikiia e ka haumana o kona wa lilo no ke Kulanui. Aole hoohiki i kinohi loa; noho no a aono malama a akaka ka pono, alaila hoohiki, e like me keia olelo, a o kona lilo io no ia i haumana no ke Kulanui. Eia ua olelo hoohiki la.

He olelo ae like a na haumana a pau i komo i ke Kulanui ma Lahainaluna.

                Ke ae aku nei au i keia mau mea.
                1. I ko'u noho ana iloko o ke Kulanui, e noho pono no wau, malalo iho o na Kumu, me ka imi i ka naauao, a me ka malama i na kanawai a pau o ke kula.
                2. Ina aole au i uku i ke Kula i kela makahiki i keia makahiki, he 20 dala, i ka wa e noho ai ma ke kula, alaila, a hiki mai ka wa e puka'ku ai, e haawi au i ke kula i palapala hooko e like me ka nui o na makahiki a'u i noho ai iloko o ke Kulanui, he iwakalua dala no ka makahiki hookahi: he palapala aie maoli keia. Aka, ina i lilo au i kumu a noho liuliu ma ia hana, aia no i ka manao o na kumu o ke Kulanui ke hookuu mai i ka aie, aka, ina i lilo au i kekahi hana o ke aupuni paha, a i kekahi hana e ae e waiwai ai, alaila, e hooko io no au i kela palapala aie, ma ke dala maoli paha, a i ole ia, ma kekahi waiwai e ae.

                KA OLELO HOOKO. I ka wa hoi iwaho ka haumana, ina i kaa ole ka aie ana, alaila; kau kona inoa i ka palapala hoaie a haawi na na kumu; he mea ia e paa'i oia i ke ao kula, a hele ole hoi mamuli o ka waiwai a me ka palaualelo, a me ka hanohano lapuwale.

PALAPALA HOOKO.

Lahainaluna, Ian. 15, 1845.
                No ka pono i loaa mai ia'u, ke ae aku nei au e uku i ke Kulanui i na dala he 60.
                Penei ka uku ana, a hala ka makahiki hookahi e uku au i na dala he 20; a pela aku, i kela makahiki i keia makahiki, a pau ka aie.
                Ina aole pela ka uku ana, e uku no au me ka uku hoopanee. Ina e lilo au i kumu palapala paha, i kahuna pule paha, a malaila no ka hana ana, aole nae nui mai ka waiwai; alaila, aole e lilo keia palapala i palapala aie a pau ko'u noho ana ma keia hana.

                MANAO HOPE. 1. E pule nui kakou i ke Akua no keia Kulanui, no ka mea, ua make hewa loa ka ike ke ole ka pono o ka naau, ka makau i ke Akua, a me ka hana maikai. Ina hoi kau nui ka Uhane Hemolele maluna o ia kula, alaila, nui wale ka pono, aole pau i ka heluia. Ma Honolulu nei, eia ko makou wa pule no ia kula, a me na kula a pau, o ka monede elua o ka malama.
                2. Mai hooili aku na makua i ke dala a me ka waiwai ku pono ole e ae, na na keiki iloko o ia kula. He mea ia e ino ai ko lakou noho ana.
                3. Ua ino kekahi hua o ia kula, aole nae pela ka nui, he maikai no; a ke hooikaika nei kekahi poe e ao kula a e hoolaha i ka pono a me ka pomaikai iwaena o na kanaka. Nolaila, mai kanalua, mai manao ua make hewa ia kula. Ua nui no ka hua maikai.
                4. Pehea ko oukou manao, ke lawe ke aupuni i ke Kulanui, a lilo loa ia no ke aupuni? Pono anei? I ko'u manao, he pono no ia, e hai mai no nae i ko oukou manao. Pau keia. LIMAIKAIKA.

HELU 1.

                Aloha oe e ka Nonanona.
                E lokomaikai mai oe, e pai iho oe i ko makou nei manao hui a e halihali imua o na lii.
                Eia ko makou manao.
                Pilikia loa makou. E aloha mai paha na'lii ia makou a e noonoo