Ka Nonanona, Volume IV, Number 21, 4 Pepeluali 1845 — Page 99

1845.) KA NONANONA. 100

i oleloia, ua olelo mai lakou ia'u e kue i na Farani, he wahahee loa ia. He wahahee wale no ia. Kokua no lakou e kaohi i ko'u poe kanaka, a e hoomalu ia lakou; aka, uwe no lakou i ko'u uwe ana, no ka hana ino ana o Du Petit Thouars a me Morenhaut ia'u. Uwe no lakou, a owau no hoi i kela la i keia la, i ka ike ana i ka mahuahua o ka hana ino iwaena o ko'u lahuikanaka, no na aoao ino, a me na hewa o na koa Farani, a lakou i lawe mai i ko'u aina, ma ka hehi ana i ka la Sabati, a me ka hoonoho ana i na mea ino he nui wale imua o ko'u lahuikanaka. A o ka hana ino o kekahi poe luna, ua oi ka ino i ko na koa.
                Paakiki loa o Du Petit Thouars, aole e kau hou i ka hae, e olelo ana he hae Beritania ia. Aka aole, aole loa no; ua ike no oia, ua ike no hoi kona mau luna, aole ia he hae Beritania. Aka no ko'u huki ole ilalo i ko'u hae, lawe wale oia i ko'u hale, ko'u aina, a me ko'u aupuni.
                Holo au i ke kanikele Beritania, i mea puuhonua, ko'u makamaka maopopo, a me ka oiaio, a hiki mai ka manawa, aole puuhonua malaila, holo au me na keiki a'u maluna o ka moku iki a maikai, o Basalisk i puuhonua.
                Noho au malaila eha malama, ua kokoke no ka moku i ka aina, ina i hooleiia kekahi ulu e kau no iuka, aka, aole au e hiki ke hoi i ka aina, no ka makau. Ua makemake ke Kiaaina Farani e loaa wau, a me na keiki a'u, aka aole au e hiki ke manaoio ia ia.
                Ua hoinoia o kapena Hunt, no kona malama ana ia'u, a no kona lokomaikai ia'u.
                Hopuia ke kanikele Beritania, o Mr. Pritchard, no kona kokua ana ia'u, a hooleiia iloko o ka halepaahao ino, a me ka mauu i ka wai.
                Kaena kekahi kanaka o D'Aubigne, kona inoa, ma ka olelo hoolaha, e lilo ke poo o Mr. Prichard i uku no ke koko o Farani hookaheia e ko'u poe kanaka. E hoapono anei oe e ke Alii i keia hana.
                Mahope o ka lawe ana i ko'u a pau, heaha ka Bruat i hana'i?
                E hoakaka au ia oe. Mahele oia i ko'u aina i na apana eha; a haawi ia lakou i na'lii i loaa ia Morenhaut. Eia no lakou, Hitote, Tati, Utami, a me Paraita, pakahi ia lakou ka apana.
                Nui ka huhu o ko'u poe kanaka no ia mea, no ka mea, aole oluolu lakou i ko lakou ike ana, ua ukuia na'lii kipi, a o ka poe hana oiaio me ka hoopunipuni ole, ua hooneleia, i ko lakou aina iho.
                Mahope hoomakaia ke kaua ma Taiiraibu, a eia ke kukmu i hoomakaia'i ke kaua.
                Hopu kekahi poe kanaka no ka moku Farani mai, i mau wahine o ka aina, aole i ae ko lakou mau kane. Hoomakaia ke kaua malaila. Alaila hopu o Bruat i na'lii o'u, a hoopaa ia lakou i ka hao maluna o ka "Uranie." no ka mea ua lohe oia, aole lakou i malama i kona olelo hoolaha, a hoao no oia e hopu i i kekahi i poe e ae. Huhu loa keia poe kanaka no keia mau mea, a akokoa lakou ma kahi hookahi. Aka aole lakou i hele i Papeite e kaua, a puhi i na hale, a pepehi i na Farani, no ka mea, paa wau a me na misionari ia lakou, nolaila hele ole lakou. Aka, aole oluolu o Bruat i keia, hoolaha oia i na olelo o kela kanaka makau wale, o Morenhaut, a alakai oia i kona poe koa i Mahaena, a kaua malaila, he kaua weli-