Ka Nonanona, Volume IV, Number 21, 4 Pepeluali 1845 — Page 97

1845) KA NONANONA. 98

a, pau e pae wale mai ma ka aina, ke loaa ole ka ae ia mai.
                Ina ua hewa na kanawai awa o'u, ina ua hoopii laua i ko laua aupuni. Aka, aole pono e uhaki i ko'u mau kanawai, a me na olelo hooponopono awa; no ia mea, ua hoihoiia laua maluna o ko laua moku.
                He wahahee keia, aole hana ino ia laua. Nolaila heaha la ka'u i hana hewa ai i keia mau kanaka? Ua hewa laua, aka, ua oi ka hewa o Du Petit Thouars, no ka mea he Admiral Farani oia, a he pono ia ia ke ike i ka pono a me ka hewa.
                I ka makahiki 1838 holo mua mai o Du Petit Thouars me ka moku nui, i kapaia ka Venus, a mawaho o ka awa. Holo o Morenhaut i kai, a maluna o ua moku la, a olelo ia ia, "o keia mau mokupuni, he mau aina maikai no Farani, a ina e hoolohe mai oe i ka mea a'u e olelo aku ai ia oe, e hiki no ia kakou ke lawe i keia mau aina i kekahi la." Alaila komo mai o Du Petit Thouars i ka awa a ku. E noho ana au ma ka moku iki, o Motuuta kokoke i kahi i ku ai ka Venus, a ma ke alo o ka kulanakauhale o Papeete.
                Houna koke o Du Petit Thouars i kekahi luna koa ona ia'u me ka palapala, a olelo mai, ua huhu loa ke Alii Farani no ka hana ino ia e a'u o na kanaka Farani, a no ko'u hana ino ana i kela mau kanaka Farani i holo mai i Tahiti, a i kela mau kahuna elua hoi o Laval a me Caset. Olelo hoi oia, o ka hana i hele mai ai, oia hoi ke koi i ka uku ku pono i kela aupuni, a me ka hanohano, a e haawi au ia ia i 2,000 dala. Huhu loa ka luna koa nana i lawe mai ka palapala, a kau pinepine oia i kona lima ma kona pahikaua, a ninau mai ia'u pehea la i hiki ia'u ke hoonaukiuki i ke aupuni nui e like me Farani? Manao ko'u poe kanaka e oki mai ka luna koa Farani ia'u me kona pahikaua, a i mai lakou ia'u e holo!
                Olelo mai la oia ia'u, he kanakolu moku ua like ko lakou nui me ka moku o Du Petit Thouars. Makau loa no wau, no ka mea, ua hanau keiki au, hookahi wale no pule mamua iho.
                O ko'u mau hoalauna, he mau misionari, he mau kanaka pono, a ua ao mai lakou ia'u, i ka pule a ka Haku, a lokomaikai mau lakou ia'u, a ua ao mai ia'u i ka mea maikai; i mai no lakou ia'u e imi i ke dala no'u, alaila i aku au, e uku no wau ia mea, alaila oluolu ua luna koa nei a hoi i kona moku: ee koke au maluna o kekahi waa, a hoe wikiwiki i Poofi. Aole au i holo ma ka waapa, o ike mai o Du Petit Thouars, a hoopaa ia'u. Aneane haalele ole au ia Motuuta, a hoouna o Du Petit Thouars i na koa malaila, e hoopaa ia'u malaila, pela ko'u lohe, a pau loa na dala i ka haawiia ia ia; aka aole au i hopuia e lakou.
                Pii au i ke kuahiwi, kokoke i Papeeete, a akoakoa ko'u poe kanaka e malama mai ia'u.
                Oia ka olelo oiaio ma keia mau mea; e hiki anei ia oe, E ke Alii o ke aupuni nui, ke hooapono i keia hana a kekahi luna koa ou, i ka wahine palupalu a paku ole?
                Eia hoi kekahi a'u e olelo aku ai ia oe. I ka makahiki 1839, holo mai kekahi moku Farani hou, i kapaia ka Artemise, ili oia ma ka akoakoa mawaho o Teaharooa; aka aole oia i poho ilalo, no ke akamai, a me ka wikiwiki i ka hana o kekahi kanaka