Ka Nonanona, Volume IV, Number 19, 7 Ianuali 1845 — Page 91
1845) KA NONANONA. 91
he nui no; eia ko lakou nui, elua o lakou haneri me ka hapa a ke hookokoke aku nei i ka ekolu haneri.
Eia kekahi; ua lako no ka mokupuni o Maui i na kumu, aia ma Hana kekahi, aia ma Makawao kekahi, aia ma Lahaina kekahi. Aia ma Lahainaluna kekahi, nolaila ua makaukau ko oukou mokupuni.
Aohe o makou makaukau; nui ko makou wahi hemahema, hookahi wale no o makou wahi makaukau o Kaluaaha. Aole a makou kumu ma Kalae, aole a makou kumu ma Halawa. Hemahema loa ia mau wahi o makou, nolaila, ke aua nei no makou i ka makou kumu no ia mau hemahema no, pono i ka ai, pono i na mea a pau, o ke kumu wale no ka hemahema nui loa, ua pau ka'u, o kau mai koe. Na'u na KALUNA.
Kanaka no oukou ma Molokai. Kei ka ikaika o ko oukou manao! Akahi no a maopopo ko oukou ikaika a me ka oukou waiwaiwai. Kainoa he poe ilihune oukou ma Molokai, eia ka he waiwai no! No ka holo nui i Lahaina paha e kuai i ka ulu moku. Pono ia.
Aka, ea, eia ko'u manao ia oukou, e hoomaopopo mai i ko oukou ikaika, a me ka oukou waiwai ma ka hana ana. He mea ole ka olelo, he makani wale no ia, ke ole ka hana. Nolaila, ea, e uku koke oukou ia Aneru e like me keia olelo maluna iho, e imi koke i $400, i keia makahiki 1845.
Alaila paa ka waha o ko Wailuku. Aole a lakou olelo. A i ole ea, akaaka Wailuku ia oukou, a make loa oukou i ka hilahila.
I LOHE OUKOU.
E na kumuao ma Oahu nei, a me ke Kahu Kula. Ke hoolaha aku au ke Kakauolelo a na Luna Waiwai o ke Aupuni i ka manao o ua mau luna la.
1. Ke Hoopau aku nei makou i ka holo ana o na kumu ao, ma na moku o ke Aupuni a pau, ma ko lakou uku o ke kula ana.
2. Ina i makemake kekahi kumu e holo ma ua mau moku la, e uku mua aku no oia i ke Kapena o ka moku, e like me ke kanawai o ka moku.
3. Ke hoole aku nei makou i ka palapala i hoolahaia ma ka Nonanona Pepa 14, Buke 3, aoao 67. E pau ia palapala ma Oahu nei, a ma Hawaii, a me Maui, a me Kauai. E pau ko laila i ka la mua o Dekemaba 1844. NA LUNA WAIWAI.
G. L. KAPEAU, Kakau Olelo.
Honolulu, Nov. 28, 1844.
KULA SABATI MA KALANIKAHUA.
"E like me ka ua, a me ka hau i iho mai, mai na lani mai, aole hoi e hoi hou ilaila, aka, e hoomau mai no i ka honua, a hoohua iho la ia ia, a hoomau no hoi, i haawi mai ia i ka hua na ka mea lulu hua, a i ka berena hoi na ka mea ai;—Pelaa uanei ka'u olelo (wahi a Iehova) ka mea puka aku, mai ko'u waha aku, aole ia e hoi nele mai ia'u; aka, e hana no ia i ka mea a'u e makemake ai, a e hooko io ia i ka mea a'u e hoouna aku ai ia ia." Isaia 55: 10, 11.
E hookoia ana keia olelo wanana ma Kalanikahua i keia manawa. I keia mau malama eha paha, ua huli nui na kamalii o ke kula Sabati malaila, i ka palapala hemolele, i ka Baibala, a paa naau na mokuna okoa, a me na apana mokuna. He mea e ka ikaika a me ka oluolu o na haumana i keia hana. Oluolu loa ko'u naau i ko'u lohe ana ia lakou i kela Sabati, i keia Sabati. Oluolu no hoi na hoahanau. Ua ikeia