Ka Nonanona, Volume IV, Number 16, 26 Nowemapa 1844 — Page 80

80 KA NONANONA. (NOVEMABA,

aina no ka makahiki i hala aku nei, ke paa la no i keia makahiki hou. Hookahi nae pauku holoi, o ka pauku ekolu, aia ma ka aoao 68. Aole pono e lawe hou i ka pia i keia makahiki, no ka mea, ua poho loa.
                2. Eia kekahi waiwai, i lohe na luna, a me kanaka, he waiwai maikai loa, o ke kope. Pono i na kanaka ke imi i kope no ka auhau o ka aina, a ua oki ka puaa, ma kahi nae e ulu maikai ai ke kope. A he mea pono i ka poe imi waiwai, e kanu i ke kope i keia manawa, a o ka poe loaa ke kope, ua like ia me ke dala. Eia ke kuai i keia makahiki, elima paona, hookahi dala, aole nae e mau ia kuai, e emi no ke hiki aku i kekahi manawa.
                Ma keia mau kanawai ua maopopo, ua ku pono na waiwai paa a pau; aole nae pono ka pia. O ke kukui, ka olona, ka ia, ke kope, ka puaa, a me na waiwai paa e aku. Aole pono na waiwai popopo wawe. Pela paha ke kanawai. Aole anei?

EWA A ME WAIANAE

                Holo iho nei au i Ewa a me Waianae; Sabati au malaila a hoi mai. Eia na mea a'u i ike ai, a i lohe ai hoi.
                Ua ino loa kau Wahi o ke alanui. O ka ua iho nei ka mea e ino ai ma kekahi mau kahawai. Maikai no nae ka nui o ke ala.
                Ahaaina Katolika ma Ewa. Mamua aku nei hoomakaukau kekahi mau hoahanau o Ewa i ahaaina no ka poe Katolika o Oahu nei; me ka manao e loaa kau wahi dala ia laua i kela ahaaina, hoouluulu nui lakou, na kane, na wahine a me na keiki; he mau haneri. Ua makaukau e ka lanai, me ka ai, a me ka ia, he nui loa. Uku no na hoaai pakahi a pau i ke dala; he hapaha paha no ke kane, he hapawalu no ka wahine, aole akaka loa.
                I ka ai ana nae, haunaele loa. Hoohalahala na hoaai, a hoopaapaa me ka walaau nui, i mua o na hoahanau nana i hoomakaukau ka ai. Nolaila, aumeume lakou i ka ai a me ka ia, ku a hele kela mea keia mea me kona wahi puu, a nui loa ka poe hoi wale me ka uku ole aku i na mea nana ka ai. Nolaila poho loa laua; hookahi haneri dala paha ka poho! Auwe ka poino o ia mau hoahanau akamai i ka noonoo. He wahi kula paha keia no laua; "e hele mai hana hewa hou."
                Halepaahao ma Waiawa. Ua paa ia hale ia Kahauolono ma; 14 anana konu loa; 3 anana a me 4 kapuai kona laula; 9 kapuai kona kiekie. Ekolu lumi no na kane kahi, no na wahine kahi; no ka waiwai kahi. Eia na dala i lilo no keia hale, $227 29.
                Waianae. Ua kokoke paa a maikai ka hale pule hou malaila; he hale lepo kawili, he hale maikai no hoi. O na pani puka koe, a me ka puna, o ka paa no ia.
                Oluolu na hoahanau ma Waianae; launa pono mai no; aole nae ikaika loa mai ko lakou manao ma ko ka uhane. Halawai pinepine makou i ka la Sabati, a hai aku au i ka olelo a ke Akua; ua mahuahua no ke anaina haipule, a makaala lakou i ka lohe.
                Hoahanau moe kolohe. Hiki au ilaila lohe au i ka mahuka ana o Nahina, he hoahanau no Honolulu nei, a he luna koa hoi; mahuka ia me kekahi wahine katolika, i ka nahelehele. Pehea la e pau ai keia ino nui o Hawaii nei?
                Uliuli maikai o Waianae i keia wa no ka ua; ulu maikai ka fiku malaila.
                E pono e kanu a nui, a paapu kela wahi i kela laau maikai.
                Ninau aku au ia lakou, no ke aha ka hemahema o ko oukou aina? aole nui ka mahiai; aole laau kanu, aole maikai na hale, a me ka aina, a me na pahale. Olelo mai kekahi, "no ka maopopo ole o ka aina; ina i hooikaika ke kanaka a paa ka hale maikai, a kanu laau; a mahiai nui i ka ai, aole maopopo kona pono malaila, no ka mea, e hemo auanei paha ka aina, a lilo pu me kona mau mea a pau." He oiaio no ia; aole nae paha liuliu a paa na aina o na makaainana, a pau keia pilikia.
                Ke kaniuhu nei na kanaka o Waianae no ka hele i Honolulu e kua pohaku no ka hale o ke'lii. Kaumaha ko lakou naau i keia pilikia.