Ka Nonanona, Volume IV, Number 15, 12 November 1844 — Page 88

88 KA NONANONA. (NOVEMABA,

E Honolulu e, he olioli ko'u ia oe, me ke aloha a me ka mahalo.
E oi aku ana ke aloha ia oe i ke ala o na pua o ka waonahele.
A e oi aku ana hoi mamua o ka ono o ka meli, a me ka lemona.
Aia hoi ma kou hale alii ka ipu kukui aniani i hoopihaia i na mea ala.
Ua kahikoia hoi oia i na mea gula a me ke daimana.
Aia hoi ma kou mauna na kihapai waina elua, a me ke zizania mawaena.
He mau mea nani ia a me ka hanohano ke nana aku.
Aloha nui oe, e ka pua rose hanohano o keia pae aina.
Mai haawi aku i kou nani i ka mea powa;
Aole hoi i kou aloha i ka mea huhu mai.
No ka mea; e olioli anei ia a me ka haanui.
Ma ka hoopono, e hookupaa ai i kou alii ana.
Aloha nui oe e ka Moi hanohano kaulana.
Nau i holo ka lae ino o Kepe Horn, kahi hoi a ka wahine ia e noho la.
Nau i hele na moana ino, e kupikipikio ana hoi ke kai,
Nau hoi i noho na mauna i paa i ka hau a me ka luaipele,
Ua noho hoi oe ma ka aina o mauna nani loa,
Ka aina hoi i hoopuluia i ka hau o ka lani.
Aia hoi oe maloko o ke kulanakauhale o Waiokila,
Ua like hoi ko'u aloha ia oe me ka ohu e nee ana i ke kahawai.
Ua like hoi me ka waipuna ma Siloama.
E Honolulu e, e hosana aku oe i ka mea nana oe i poni i alii Kristiano.
No ka mea, oia ka mea e mau loa ai kou alii ana.
E Hosana, e Hosana, ia Iehova ke Akua mana loa.
Me ke kani ana o ka Violaumi, a e like hoi me ke kani ana o na bila.
Pela oe e kanikau aku ai ia Iehova.
LIBINI NAILIILI.

Kailua, Okatoba 23, 1844.
                Aloha oe, e G. P. Iuda; Ke hai aku nei au ia oe, ua hiki mai au ma Hawaii nei i ka la 22 o keia malama, a ua ike au ia Kuakini, he oiaio no ka nui o kona mai, e like no me ko kakou lohe; a ua ike maka iho nei au, ua emi kona kino, a ua wiwi loa; ua emi ka ai ana, ua pau kona ike i ka eha olalo, oluna wale no kona wahi ike.
                Eia oia e waiho mau ana ma kahi moe, aole hiki ia ia ke ala ae iluna, oia ka'u mea i ike nona, aole paha e liuliu kona mau la i koe e noho pu ai me kakou.
                Oia ka'u mea i ike, aole mea hou ma Hawaii nei e hai aku ai au ia oe.
                Aloha maikai oe,
Na'u na KEKAULUOHI.

KA MANAO O NA KANAKA MA WAILUKU.

                Akaka keia manao koikoi ma ka palapala a Kaauwai malalo iho. Penei kana,
                "E noi aku ana makou o Wailuku nei, i kumu hou na makou; no ka mea, ua ike iho nei makou i ko makou hemahema i keia mau makahiki i hala ae nei. Eia ke kumu a makou e noi aku nei, o Aneru o Molokai; no ka mea, ua pono ia Hikikoke, ka oihana kahuna, a ia Kulika ke ao aku. Auhea ka hemahema o Molokai?
                Eia kahi; nui ko makou manao e ao ka makou mau keiki i ka olelo Beritania, a i ka mahi ai kahi, a i ka hana kahi, a i kela hemahema keia hemahema. Nolaila e hoouna aku oe ia Nonanona, oia ka hiki wawe i ka hele aku, e kukakuka me na misionari, e ae mai i ko makou manao.
                Mai kanalua no ka uku; ia makou ia wahi, a na makou no e hoopii aku i kahi a makou e manao ai, ke kuu mai oukou, na makou e malama i kona ola.
                Eia kahi mau pono a makou e noonoo ai.
                1. Ke ao nei na'lii o ka aina i na olelo a ko oukou aina.