Ka Nonanona, Volume IV, Number 14, 29 October 1844 — Page 82

82 KA NONANONA. (OKATOBA,

Kanakolu kumamalima tausani! Oiaio, 35,000 dala, kokoke hapahiku ia o ua puu dala la, 250,000. O na misionari a pau i hoounaia'ku e ko makou poe luna i na aina a pau, 348 lakou; a ma Hawaii nei, 83 o lakou, kokoke ia he hapaha o na misionari i hoouna ia. A ua haawi ia mai na dala 35,000 i keia makahiki, i kela makahiki, i mea e malamaia'i keia misionari! Pono anei keia? I ko'u manao, aole pono. No ka mea, ina e hanai na hoahanau ekalesia a pau mai Hawaii a Kauai i na kahuna pule; e malama i na kumuao; kuai i na baibala, no lakou, a me na buke e ae no ka lakou keiki; e kukulu i na luakini, a me na hale kula, alaila, ua koe ua mau tausani dala la i hoounaia mai, mai Amerika mai. Alaila, e hiki i ko Amerika poe luna misionari ke hoouna aku i ka euanelio i ko na aina e, i ko Aferika, i ko Asia, a i ko na aina iloko o na moana. Aole anei he wahi hana nui loa keia? Oiaio no ia. Aole hana like. Aole pono e hoomaunaunaia kekahi waiwai iki. A pehea ka waiwai o ko Amerika poe? I ko'u manao, o ka nui o na dala 35,000 i hoounaia mai, e hanai kahuna pule, a e malama kumu ao, he waiwai poho no ia, no ka mea, he mea ia e lilo ai oukou i poe palaualelo i ka hana, a i poe puni dala hoi; he mea ia e poino nui ai ka ekalesia o ka Haku, a he mea ia e make nui ai ka poe e noho ana ma na aina pouli! Aloha ino! Minamina loa au i ka waiwai a ke Akua i haawi lilo ole mai i kona poe kanaka i mea e hoolahaia'i kana olelo a puni ka honua. No ia mea, e na hoahanau ekalesia o Hawaii nei, e ka poe i kuai ia i ke koko o ke Keiki a ke Akua, e ala oukou mai ko oukou hiamoe ana. E manao paa oukou e komo wawe iloko o ka hana a ka Haku, e kokua mamuli o ke kukulu ana i kona aupuni ma ka honua. E olelo aku i ko Amerika poe haipule, a me na luna misianari penei: "E na hoahanau aloha, nani ke aloha o oukou i hoike mai ai ia makou, i ko makou noho naaupo ana, i ko oukou hoouna ana mai ia makou i ka euanelio a Iesu Kristo. A i ko oukou hanai ana i ka makou poe kumu. I na makahiki he iwakalua a me ke keu, ua malama oukou ia lakou, ua haawi mai i ka berena, a me ka ai, a me ia; ua kokua mai oukou ma ke kukulu hale pule, a me na hale kula, a ma na mea e ae he nui wale. Pono paha ia mamua, i ko makou noho naaupo ana, a me ka ilihune, a me ka hoomaloka, uuku na hoahanau ekalesia. Aka, ua pau ia noho ana; ua emi nui ka naaupo o kanaka; ua emi ka ilihune; mahuahua ka poe manaoio, he nui wale na hoahanau ekalesia. Nolaila, ua hilahila makou e kokua hou ia mai e oukou, ma na kumu a me na dala. Ua pono ole ia hana. E oki oukou i ka oukou hana ana ma keia pai aina. Mai haawi hou mai i ka oukou waiwai i mea e malamaia'i ka makou poe kumu. O ka makou hana no ia. Ma ka hanai kahuna, ma ka malama i ka makou poe kumu ma na mea o ke kino, e hiki paha ia makou ke hookaa aku i kekahi o ka makou aie nui ia oukou. No ia mea, me ke aloha nui aku ia oukou no ko oukou lokomaikai mai, ke ae aku nei makou i ko oukou huli ana mai o makou aku. E hele nui oukou i na aina pouli, e halihali i ka lama o ke ola, i ike ko na aina naaupo a pau loa i ka mea e ola'i i pakele lakou i ka make, a i ola ko lakou poe uha-