Ka Nonanona, Volume IV, Number 13, 15 ʻOkakopa 1844 — Page 78

78 KA NONANONA. (OKATOBA,

KA MAKE.

Kalihi, Oahu, Sepat. 29, 1844.
                Ua make iho nei o Gomera Naaha, kekahi haumana o ke Kulanui ma Kalihi nei, hookahi makahiki o kona mai ana. Aole keia haumana i ao nui aku i na kamalii; no ka mea, loaa koke no ka mai ia ia.
                Ua kaumaha ka naau o kana wahine, no ka make ana o kana kane; no ka mea, oia ka makamaka i hiki ai ma Oahu nei. No ke kula kaikamahine ma Wailuku keia kaikamahine. Ua noho oluolu o Gomera Naaha me kana wahine; aole hoino, aole huhu, aole no hoi he hana lapuwale. Ua noho o Gomera Naaha ma Lahainaluna i na makahiki ekolu, a ua hoi mai oia me ke aloha ia mai e na kumu o ke kula nui. He hoahanau oia ma ka ekalesia 2 ma Honolulu nei, o L. Kamita, he kumu ma keia ekalesia. Aloha ino o Gomera Kaaha, ka mea e hele ana imua o Iehova. Aloha no hoi kana wahine ka mea e noho ehaeha ana.
J. NAILIILI.

NA HALE PAU I KE AHI.

                Elua wela ana o na hale o Honolulu nei i ke ahi i keia mau la i hala ae nei, aia iwaena konu o ke kulanakauhale. O ka hale puhi palaoa o ka Pake, ua pau loa i ke ahi: i ka la 21 o Sep. a i ka hora 11 o ka po iho ka wela ana. 2,000 pauna berena a me kekahi waiwai e ae, i pau pu me ka hale.
                Mai wela pu ka hale paipalapala o ke aupuni, no ke kokoke i ua hale nei o ka Pake. Ua pakele nae.
                I ka la 29, o Sep. i ka hora 1 o ka po, ewalu hale pili i pau i ke ahi; ma kahi kokoke no i ka hale paipalapala o ke aupuni, aia ma ka ka Pi ta. Ua manaoia, no ke kolohe ka wale ana o keia mau hale, aole nae akaka loa.

KA HUITA.

                Ke lohe ia nei ma ka pepa o ke aupuni, ua makemake kekahi haole hana palaoa ma Amerika, ma ka aina o Merelani, e holo mai i keia pae aina, e kanu huita, oia hoi he palaoa, a e wili palaoa ma Maui. Pehea keia? Pono anei? Ua lohe paha kela haole i ka maikai o ka huita ma Kula. O ka wai ole paha ka hewa: aole wai e wili ai.

HE NINAU MA KA HELU.

Lahainaluna, Sepatemaba 23, 1844.
                Auhea oe, e ka Nonanona. Eia kekahi ninau i hai ole ia mamua. Aia ma ka buke 3; aoao 42. Ina he mea pono ia oe ke hoolaha aku.
                EIA UA NINAU LA. "E holo ana na moku elua i ka la 2 o Augate, 1 ka makahiki 1843: o A a me E ka inoa o na kapena o ia mau moku. I kekahi la, ana iho la o E i ke kiekie o kona moku, a loaa 100 kapuai. Ana iho la no hoi oia i ka huina haahaa o lalo o ka moku o A, a loaa 2 degere.
                Ehia ka loa mai ka moku o E aku a hiki i ka moku o A?
                E ka poe akamai i ka helu, e wehewehe mai."

NA LUNA I KOHOIA.

Na ke Kiaaina Oahu.
                ROBERT BOYD, Makai Nui, i Luna makai, a i Luna Hale Kuai, ma ka hakahaka o L. G RAVIER, ka mea i waiho mai i keia hana.
Na ke Kiaaina o Kauai.
                KANEHOA, i Lunakanawai no na haole.
Na ke Kiaaina o Maui.
                HENRY S. SWINTON, Luna Dute ma ka hakahaka o D R, E. HAWKES.
Na ke Kiaaina o Hawaii.
                KAPA, i Lunakanawai mai Keahewai a Kaawaloa.