Ka Nonanona, Volume IV, Number 12, 1 October 1844 — Page 71

1844) KA NONANONA. 71

ole ia. Aka, ea, ina i kuikahi pu ka manao o na kanaka me kou, a paulele lakou ia oe, o ka pomaikai no ia; oluolu ka noho ana, e like me ka makua me na keiki; alaila holo na hana maikai ma kela aina.
                Ninau mai paha oe, "pehea la wau e hana'i, i makemakeia mai au e na kanaka pono a pau?" Penei.
                1. E hoolilo i kau mau olelo a pau i mau olelo oiaio. Ina ike na kanaka he lauwili wale kau olelo; a he hoopunipuni kekahi olelo, o ko lakou kahaha no ia, a pau ko lakou manao ia oe he oiaio. Penei ka olelo a Solomona, ke alii akamai loa, "na ka lokomaikai a ma ka oiaio e malama mai i ke alii." E nana pono oe, i keia mau hua, i ka lokomaikai a me ka oiaio; he mau kaikamahine mahoe laua, me he mau anela la mai ke Akua mai, e kau ana maluna o ke alii; a e malama ana ia ia. Aole poino ke alii ke komo nui laua iloko ona; a noho kamaaina loa malaila; na laua no e pale aku i na mea ino a pau. Penei hoi kekahi olelo a Solomona, "o na lehelehe oiaio, e mau ana no ia." Olelo kekahi alii Farani, he alii naauao no hoi, o Ioane kona inoa, "ina i kipakuia ka oiaio mai keia ao aku; e pono no e noho oia iloko o ka poli o na lii." He oiaio no ia. Ina i hoopunipuni ke alii, pehea la e paulele ai na kanaka ia ia? Aole loa e hiki; no ka mea, ua ike lakou, ua like ole kana hana me kana olelo; o ka haohao no ia, a me ke kanalua a me ke kahaha.
                Nolaila, ea, e hooko maoli oe i kau mau olelo a pau; mai ae oe i kau wahi hua hookahi au i hoohiki ai e lilo i mea ole imua o na kanaka. No ka mea, hoowahawaha na kanaka a pau i ke alii malama ole i kana olelo. Ua oleloia no Wasenetona ua ku paa loa ia mamuli o ka oiaio, mai kona wa uuku a hiki i kona la e make ai. Aole lohea kona hoopunipuni ana. I kona wa kamalii, ee malu oia maluna o kekahi lio hou laka ole, no kona makuwahine: lele loa ka lio iluna, ilalo, io ia nei, a moku kekahi aa koko, hina ilalo a make loa. Hoi no ia i ka hale, a ninau aku ka makuwahine ia ia, "e Geogi, ua ike anei oe i kuu wahi lio?" Aole ekemu ae; a ninau hou aku kela me ka haohao, "aole oe ike i ko'u wahi lio?" O kona hai pololei aku no ia, penei, "ua ike au i kou lio, a ua make ia'u." Ua aha? "ua make ia'u; olelo kona makuwahine," pono oe e kuu keiki, i kou hai pololei mai ia'u, me ka lokomaikai. Ua hewa no ka make ana o kuu lio, aka, aole o'u manao nui malaila." Kakaikahi paha na keiki hana me keia.
                Pela no ke ano o Wasenetona a hiki i kona la i make ai: malama loa oia i kana olelo, aole loaa ka hoopunipuni ia ia. Nolaila, paulele loa na koa ona, a me na luna koa, a me na alii a me na kanaka a pau i kana olelo; no ka oiaio.
                Pela oe e hana'i, e kuu hoaaloha, e Leleiohoku e; e like loa me kau olelo, pela oe e malama'i; o kou nani no ia. Pehea la e paulele ai na kanaka i ke alii hoopunipuni, a lauwili wale kana olelo! Aole paulele; a o ke kumu keia o na hewa he nui wale. E aho e poho kau waiwai, he hewa loa ke poho kau olelo.
                2. Eia kekahi mea e paulele ai na kanaka ia oe, e malama loa oe i na kanawai o ke aupuni.
                Ina ike na kanaka ia oe, ua pale ae oe i kekahi kanawai, o ke kumu