Ka Nonanona, Volume IV, Number 12, 1 October 1844 — Page 69

KA NONANONA.
" E ka mea hiamoe, e hele oe i ka nonanona, e nana i kona aoao a e hoonaauao iho." SOLOMONA.
Buke 4. HONOLULU, OAHU, Okatoba 1, 1844. Pepa 12.

NO KA HANAI I NA KAHUNAPULE. Helu 7.

Makawao, Maui Hikina, Augate 12, 1844.
                E na hoahanau ekalesia mai Hawaii a Kauai. Aloha oukou a pau loa. I ko'u noonoo ana, ua maopopo ia i ko'u manao, o ko oukou malama ana i ka oukou poe kumu, ma na mea o ke kino, he mea ia e nui ai ko oukou aloha kekahi i kekahi.
                O ke aloha, he mea ia e oluolu ai ka noho pu ana o ka makua a me kana poe keiki, o ke kumu a me na haumana ana, o ke kahuna pule, a me kona poe hoahanau. Ina he nui ke aloha kekahi i kekahi, alaila, ua oluolu ka noho ana, ikaika hoi ka hana ana, a he mea io ka pomaikai. O ke aloha, ua like ia me he kaula gula la, he mea ia e paa pono ai ke kahuna a me kona poe hoahanau. No ia mea, pono kakou e noonoo a hana hoi ma na mea e nui ai ke aloha.
                A heaha na mea, e na hoahanau, e nui ai ke aloha o ka oukou kumu ia oukou? O ka hoole anei i ka oukou aie no kona haawi pinepine ia oukou i ka euanelio? Oia anei? O ka noho palaualelo anei, a me ka palaka? O ka hoomaunauna waiwai anei ma ka hanai i na kanaka palaualelo? O ka puni waiwai anei? O ka aua anei i ka oukou waiwai, a me ka oukou hana, aole kokua mamuli o ka ke Akua hana? Oia anei? Pehea ko oukou manao? He mau mea anei keia e nui ai ke aloha o ka oukou kumu ia oukou? Aole loa. He mau mea e moku liilii ai ua kaula gula la! He mau mea e pio ai kona aloha ia oukou.
                Aka, o ka malama pono ana i ka oukou kumu ma na mea o ke kino, oia ka mea e nui ai kona aloha ia oukou. Ua maopopo keia, no ka mea, ma keia hana, ua ae oluolu aku oukou i ka oukou aie na ke Akua, a na ka oukou kumu no hoi. Ma keia hana, ua ae oukou i ka maikai o ka euanelio a ka Haku. I ka oukou hana ana ia mau mea, hanai i ka oukou kumu, malama kula, kuai palapala, a me na hana like, aole hiki ia oukou ke noho a hana palaualelo, a me ka molowa, a me ka palaka. I ka oukou hana ana ia mau mea, aole e hiki ia oukou ke hoomaunauna i ka oukou waiwai ma ka hanai ana i ka poe palaualelo. I ka oukou hana ana ia mau mea, aole oukou e lilo i poe puni waiwai. Aole oukou aua i ka ke Akua hana. Hana oluolu no mamuli o ko ke Akua makemake, no ia mea, e mahuahua ko oukou naauao, a me ka ike, a me ka ikaika i ka pule, a i ka hana maikai hoi. A ike ka oukou kumu i keia, aole anei e mahuahua kona aloha ia oukou? Mahuahua no, no ka mea, ua ike oia i ka hua momona o ka euanelio o Iesu Kristo. Nolaila, e olioli no ia, a e kaena pinepine oia no oukou.
                A e mahuahua no hoi ko oukou aloha i ka oukou kumu. Elua mea e maopopo ai keia. Eia ka mua. O ko oukou kokua ana ia ia ma kona mea hemahema a pau, oia ka mea e mama ai kona manao, no ia mea, ua nui a maikai hoi kana hana ana. I ko'u manao, he hapa wale no ka ikaika o ka lima o ke kahunapule,