Ka Nonanona, Volume IV, Number 11, 17 Kepakemapa 1844 — Page 68

68 KA NONANONA. (SEPATEMABA

                Manao iho la ka luna, pono no ke keiki ke uku e like me ke ano o ke kanawai kula, a i ole ia, na kona makua paha e uku.
                Ae mai no hoi ka makua "pono ke uku." Aka, aole i hiki ia ia ke malama i ke kanawai a maopopo ka olelo a ke kahuna pope! no ka mea, ua huli ua makua nei, i kela aoao. A no keia olelo ana hoi i ka luna, hele no ia malaila. Aka, i kana olelo ana'ku i ua kahuna nei, "pono no ke ukuia," no kela keiki, akaaka wale mai la ke kahuna, me ka i ana mai, "ka! ua paa no keia keiki ia'u. Aole e kula hou ia me oukou. Aole hoi e uku iki no kona haalele wale ana i ke kula. He mea ole ke kanawai!"
                A pau ka olelo pu ana ma ia mea, manao ka luna e hoi. Alaila i hou mai ke kahuna. "Ea, u oki ka oukou mau hana maanei. He mea lapuwale no ia. E pau koke ana no hoi ko oukou aoao ma Hawaii nei. Ekolu makahiki e koe, a e pau loa ko oukou maanei! O makou no ka e lanakila" Pela mai ua kahuna nei.
                He manao ko'u, no kela olelo a ke kahuna pope. Penei; he olelo haanui maoli no kela, a me ka lapuwale loa. Nawai la i hai mai kela olelo, i ke kahuna pope "e pau koke ana ke aupuni o Iesu Kristo ma Hawaii nei?" E noonoo kakou, no ka mea, okoa no kela olelo a okoa no hoi ka ka Palapala Hemolele. Peneia ka ia nei e "lilo ke aupuni o ke ao nei no ko kakou Haku, a no kona Kristo; a oia ke Alii e mau loa ana, i ke ao pau ole." A ina e lilo ana ke aupuni no Kristo, pehea la oia e lilo ai no ka poe hoomana kii?
                Ua maopopo; okoa kela olelo. A, pehea, ka poe hai aku, i keia mau olelo ku e i ka olelo a ke Akua? E nana i Gal. 1: 8.
                Eia no hoi, Ina paha e lilo ana keia aupuni no ka pope, pehea la uanei ko keia pae aina? E pomaikai anei lakou? E maluhia paha? E lilo anei lakou i poe naauao, a me ka maemae?
                Pehea, ko Ia talia a pau, a me ko Sepania, a me ko Patugala a me ko Auseturia, a me ko na aupuni pope e ae?
                Aloha ino ko Hawaii nei ke komo kekahi o lakou iloko o ia hewa nui! me he poe makapo la lakou, ina pela ka lakou hana. E pono no, ke hookaakaaia ko lakou mau maka, i ike pono ia ko lakou wahi e hele ai; i ole o lakou e hoopunipuni ia a e alakaiia iloko o ka make mau loa.  Na BONA.

PEPEHI KANAKA.

                Penei ka pepehi ana; e noho ana ma Manoa na kanaka elua, o Kalama a me Moalii, ko laua mau inoa, i ka la 13, o Sep. nei, e hookuukuu pihi ana; a eo i kekahi. Hoopaapaa laua a ikaika loa ka olelo. O ka lalau aku no ia o Moalii ia Kalama, ma ke kainalua, o ka hai no ia o ka ai, a me ke kikala, a ua kokoke make loa. Ua manaoia aole ola. Ua paa o Moalii i ka hao, e kali ana i ke ola a i ka make paha o Kalama.
                He kumulua o Moalii; ua ao aku oia i keia hana ino ma Manoa, a nolaila kona akamai i ka pepehi.
                Ua akaka ma keia pepehi ana, ka hewa o ka hookuukuu pihi, a me na hana piliwaiwai a pau, e like me ka noa, ke konane a me ka pepa.
                He nui wale ka ino iloko o keia mau hana lapuwale. O ka lua kekahi; hookahi wale no ano o ia hana, oia hoi, o ka pepehi kanaka. Ahea la pau keia mau hana ino ma Hawaii nei, a e huli na kanaka ma na hana maikai a me ka naauao.