Ka Nonanona, Volume IV, Number 11, 17 September 1844 — Page 66

66 KA NONANONA. (SEPATEMABA,

me ko'u imi ana. E hele pela oe, e ke kanaka lapuwale; no ka mea, he aina kou, aole hoi oe e hana i na mea e maikai ai: neoneo wale no kou aina, aole laau malumalu, aole laau hua, aole laau wahie maluna iho. Naaupo loa oe a me ka palaualelo, a nolaila, ua pau ka'u olelo ana ia oe; makemake ka Nonanona e iniki i kou ili a puni a piha oe i ka eha.
                Aka, ua lana ka manao o kekahi poe e kanu laau, a e hoomaikai i ko lakou aina a e hoowaiwai hoi i ke aupuni, e like me ka manao o ka Nonanona. Na lakou keia olelo paipai hou.
                Eia no keia mau laau maikai, a ku pono hoi i keia pae aina.

KA ULU.

                O KA ULU. Ua nui keia laau ma Lahaina, ma Hilo, a ma na aina e ae kekahi. Ulu maikai ka ULU ma kahi ua a ma kahi lulu, makani ole; aole pono ma kahi makani ikaika. Ma na aina makani e like me Kaneohe, Kohala, Hamakua ma Maui a me na aina like, aia ka ULU ma na awawa a ma na wahi lulu. Pono iki malaila; ina he aina ua ole, a ua momona nae ka lepo, e like me Lahaina, pono no ka ULU malaila.
                He mea nui loa ka ULU ma Bolabola a me Nuuhiwa a me na mokupuni e ae iloko o keia moana. Aole ulu maikai loa ma Hawaii nei e like me malaila: liilii maanei, nunui malaila.
                He nui ka waiwai o ka ULU; nui loa. Eia kekahi waiwai, o ka papa. Ua olo nui ia ka ULU ma Bolabola, a ua maopopo ka maikai o na papa; ua ikea na papa ULU ma Lahaina, he maikai. Ku pono keia laau i ka pahi olo; aole paakiki loa e like me ke koa, a me ke Kamani; pahee ka pahi olo iloko o ka ULU.
                He waiwai nui ka papa, e oluolu ai ka noho ana. Pomaikai ko Hawaii nei ke nui ka papa, maikai na hale a me na pa, a me na mea he nui wale, a pehea la e nui ai ka papa? E kanu nui i ka ULU ma na wahi ku pono a pau, a e nui loa auanei na laau papa ma keia hope aku. He hiki wawe ka ulu ana o keia laau; aole loihi loa, ke kanuia ma kahi maikai. Ina i kanu na makua i keia wa, ike maopopo na keiki i kela waiwai o ka ULU.
                He laau hana hale no hoi ka ulu; loaa ke oa, a me ke kua, a me na kia malaila.
                Eia kekahi waiwai o ka ULU, o kona hua. He ai maikai loa ia no ke kanaka a me ka holoholona; o ka ai nui no keia ma Bolabola a me Nuuhiwa. Luhi ole ke kanaka i keia ai; aole like ia me ke kalo a me ka uala. He mea kuai ka ULU ma Honolulu nei, elua no ka hapaumi, Ina i nui na ULU ma keia