Ka Nonanona, Volume IV, Number 11, 17 September 1844 — Page 65

1844.) KA NONANONA. 65

hema i kau hana ana, no ka naaupo. O ka ike nui, a me ka naauao nui, oia ka mea e nani ai ka hana a ke Kiaaina o Hawaii. E hoomanao ia Solomona; oia ke alii Pookela o ka wa kahiko. Aole ona lua; aole hoi he lua no kona aupuni hanohano loa. A heaha la ka mea e hanohano loa ai? O ka naaupo anei? Aole loa; o kona ike a me kona naauao, a me kona noiau, oia na mea nui iloko o kela alii, a nolaila ka maikai o kana hana ana. Pela no hoi o Wasenetona, he alii huli nui i ka naauao.
                Nolaila, e kuu hoaaloha e; a i noho iho oe, e mahele i na hora o ka la, no kela hana, keia hana, e hookaawale i kekahi mau hora heluhelu palapala a me ka noonoo ia oe iho. E kuai oe i na buke a pau loa i paiia ma ka olelo Hawaii; e waiho pu iloko o kou hale, a e heluhelu ia mau buke a pau. O ka Baibala, oia ka buke Pookela loa, e heluhelu pinepine malaila; o ka Hulikanaka, he buke ku pono loa ia i ke Kiaaina; a o ke Kanawai hoi, a me na buke a pau. O ke Kumu Hawaii, Lama Hawaii, a me ka Nonanona, e loaa ia oe kekahi ike iloko o lakou.
                Eia kekahi; O ka olelo Beritania, e huli no oe ia olelo. Mai kanalua oe no ka paakiki; loaa no, ke huli ikaika me ka hoomanawanui. He ui wale no oe, i keia wa, a ina e hooloihi ke Akua i kou ola ana, nui na makahiki i koe ia oe, e huli i ka naauao. Ina i hoomaka oe i ka imi i ka olelo Beritania i keia wa, aole ole o ka loaa. A o keia imi ana, he mea ia e pale ae i ka noho wale; a e makaukau ai kou noho alii ana. E aho ka naaupo o na lii kahiko, i ka wa naaupo like na kanaka a pau. Aole he nui na haole i kela wa; he okoa keia wa. Aole pono na lii naaupo i keia manawa.
                Eia na lii opiopio ma ke kula o Mi. Kuke; makaukau loa lakou i ka olelo Beritania. O ka lakou olelo no ia e noho nei; a ke huli ikaika nei hoi lakou i ka naauao, i pono ka lakou hana ana, ma neia hope aku. A pehea auanei oe? Nui ko lakou ike, a he hapa loa kou ike? hemahema a me ka hilahila loa auanei paha oe, ke noho wale oe i keia wa, me ka huli ole i ka ike a me ka naauao. Nolaila, e kuu hoaaloha e, e like me ko'u makemake nui, e pomaikai kou noho ana, a me kau hana ana, pela no au e paipai nei ia oe, e huli i ka ike a me ke akamai, a me ka naauao. A eia ka mea e hiki ai, o ka mahele pono i na hora o ka la, a e haawi i kela hora, i keia hora, i kana iho, a e hooikaika loa oe malaila. Mamuli ike oe i ka pono o keia manao, ke hana oe.
                Aole pau na manao iloko o'u. Ma kela pepa, ike hou oe.
MAKUAKANE.

LAAU KANU.

                E ka mea heluhelu; ua nana anei oe i kela olelo no na "laau kanu," ma ka Nonanona 10? Ua ike paha oe a pehea kou manao? Manao anei oe e kanu i kela mau laau, i ka fiku, i ka alani, a me ka wi? Malama paha, ua heluhelu wale no oe, me ka hoomaloka, a me ka hoole iloko o kou naau, aole e hana e like me ka makemake o ka Nonanona. Ina pela, ea, make hewa loa ke olelo hou ia oe, ke kanaka naaupo a me ka palaualelo. Aole o'u manao e olelo hou aku ia oe, o poho wale kuu inika a me kuu pepa, a me kuu luhi a