Ka Nonanona, Volume IV, Number 11, 17 September 1844 — Page 63

1844.) KA NONANONA. 63

                E na hoahanau, e heluhelu pinepine a paa naau ia oukou keia mau pauku. Alaila e hele oukou a hana e like me ka ke Akua kauoha, i pakele oukou i ka poino o ka poe aua i ka lakou hana, a me ka lakou waiwai; ka poino e hiki mai ana maluna o ka poe hanai ole i ka lakou poe kumu, a i loaa ia oukou ka pomaikai a me ka waiwai a ke Akua e haawi mai na ka poe e hoolohe ia ia a malama, ma na mea o ke kino, i ka lakou poe kumu. No ka mea, ua ike ia ma na aina a pau loa, mai ka wa kahiko loa mai; ua hoomaikai mai ke Akua i ka poe a pau i hana pela. E hoao oukou e na hoahanau a pau i ike oukou i ka oiaio a me ka lokomaikai o Iehova.
Na'u na GELINA.

HE MAU WAHI MANAO NO KE KIAAINA HOU O HAWAII. HELU 2.

                E LELEIOHOKU E: Aloha oe; Eia mai keia palapala hou ia oe, e kuu hoaaloha; no ka mea, iini loa ka naau o Makuakane, e lilo oe i Kiaaina hanohano oiaio, a i Kia paa loa a me ka nauwe ole, iloko o ke aupuni o Hawaii nei; a nolaila, aole paha pau wawe kuu ao ana, a me kuu paipai ana ia oe.
                Ma kela Nonanona, paipai au ia oe e noho pono maoli, a e hana pololei loa imua o na kanaka malalo ou. Aole pau ka olelo malaila. Eia hou no.
                1. O NA MEA ONA A PAU LOA; e like me kou hoohiki ana mamua ma Lahaina, e haalele loa i na mea ona a me kou kakau ana i kou inoa me na lii ma ka palapala i kapaia "KE OLA O KE AUPUNI," pela no oe e kupaa loa ai. E hookanaka loa oe malaila; mai hoopa, mai lawelawe i na mea ona a pau. No ka mea, ea, he oiaio kela olelo, "o ke ola ia o ke aupuni." Pono ole keia lahuikanaka ke inu hou na'lii i na mea ona; ina hoopa iki na lii i na mea ona, hoomahui koke na kanaka, a o ka hele nui aku no ia malaila, a o ka pilikia ka hope. Ua ike pu kakou i keia mamua aku nei; ua nui ka ino, a me ka haunaele, a ua aneane pono ole keia aupuni, no ka ona. Ua inu na'lii, a mai ia lakou aku, holo palahalaha keia ino nui iwaena o na kanaka.
                I keia wa hoi, ua maikai; nani ka maikai. Ke kupaa nei ka Moi, a me kona poe alii, ma ka inu wai; aole inu waina, gini, barani, rama, a me na wai hehena a pau; e pela e hookupaa'i kakou a pau.
                Eia nae kekahi moonihoawa koe ma Hawaii nei, o ka AWA, He diabolo nui keia e hoowalewale ana a e ale ana i na kanaka he nui wale. Ua paleia na wai haole e ona'i, a ua hoi hou kekahi poe i kapaia he "puali inu wai," i ka mea kahiko, i ka awa. Olelo lakou "no ka mai ka inu awa." Aka, ea, he haohao kuu manao i kela olelo; he hoopunipuni paha ka nui o ka poe olelo pela. No ka makemake no i ka ona ko lakou inu awa ana; no ka mea, aole akaka ka mai pilikia, i hiki pono ke lalau i kela mea ona.
                Nolaila, e kuu hoaaloha e, ina mai oe, mai inu oe i ka awa, e imi oe i laau e ae no. A i pono ole malaila, e hoomanawanui no, a ike na mea a pau o ka awa wale no koe. No ka mea, ina inu ke Kiaaina i ka awa no kona mai, o ka lilo no ia i kumu no na kanaka a pau, e inu awa me ke kolohe. Nui loa ka poino ke hanaia pela.
                Ninau mai paha oe, heaha ka he-