Ka Nonanona, Volume IV, Number 11, 17 September 1844 — Page 62

62 KA NONANONA. (SEPATEMABA,

e loaa hou mai no ia ia oe." Solomona 19: 17. "O ka mea manawalea aku i ka ilihune, haawi aku oia na Iehova, a o kana mea i haawi ai, na kela no e hoihoi mai ia ia." Malaki 3: 10. "E lawe mai i na waiwai hapaumi a pau iloko o ka hale ahu waiwai, i ai maloko o ko'u hale; a e hoao mai oukou ia'u ma ia mea, wahi a Iehova o na lehulehu, i wehe ai paha au i na puka wai o ka lani, a e ninini iho i ka pomaikai maluna o oukou, a pau aku la, aohe koe. A no oukou wau e papa aku ai i ka mea hokai, i hoopau ole ai ia i ka hua o ko oukou aina, aole hoi ia e hoolilo no oukou i ke kumuwaina o ke kula i mea hua ole, wahi a Iehova o na lehulehu." 2 Korineto 9: 6, 9. "O ka mea lulu liilii, e hoiliili liilii no ia; a o ka mea lulu nui, e hoiliili nui no hoi oia. E like me ka manao ana o kela mea o keia mea iloko o kona naau, pela ia e haawi aku ai, aole me ka minamina, aole hoi me he mea la i auhau ia; no ka mea, ke aloha mai nei ke Akua i ka mea nana e haawi oluolu aku. A e hiki no i ke Akua ke hoonui ae i na mea maikai a pau ia oukou i lako mau oukou i na mea a pau."
                A heluhelu ka poe haipule i keia mau olelo, a me na olelo like, manao lakou he oiaio maoli keia; aole lakou kanalua iki, aole pale aku, ae koke no. No ia mea, aole lakou aua i ka lakou waiwai, a me ka lakou hana. Haawi oluolu lakou ia lakou iho i ke Akua, a me ka lakou mau mea a pau. Maluhia lakou i ka lakou poe kumu, kokua no hoi ma ka hoolaha baibala, a ma ke kukulu i ke aupuni o ka Haku a puni ka honua. A i ka lakou hana ana pela, aole poho ka lakou waiwai, aole emi, mahuahua no; no ia mea, ua ike lakou he oiaio ka ke Akua olelo.
                E na hoahanau, e nana oukou i ka mooolelo no ka poe mamo a Iseraela i kakau ia ma ke Kauoha kahiko. I ko lakou haawi mau ana i ka hapaumi o ka lakou mau mea a pau e like me ke kanawai o Iehova, ua nui loa ko lakou pomaikiai. I ka wa o Hezekia ke Alii haipule, ua lawe na kanaka a pau i ka hapaumi o ka lakou mau mea a pau iloko o ka hale o Iehova. A pehea? Ua ilihune anei lakou malaila? Aole loa. Menei ka olelo a ke kahuna ia Hezekia, 2 Oihanakahuna 31: 10. "Mai ka hoomaka ana mai e lawe i ka mohai iloko o ka hale o Iehova, he ai no a maona a koe no ka nui, no ka mea, ua hoomaikai o Iehova i kona poe kanaka, a eia ke koena, o keia mea he nui no."
                Aka, i ko lakou aua, aole malama i ka luakini o Iehova, aole haawi i ka hapaumi o ka lakou waiwai, ua loaa koke ia lakou ka popilikia. Menei ka Iehova, Hagai 1: 9-12. "Kuko aku la oukou i nui, a he uuku; lawe aku la oukou iloko o ka hale, a pupuhi aku la au ia; No ke aha? wahi a Iehova, ke Akua o na lehulehu. No kuu hale no i neoneo, a holo oukou a pau i ko oukou mau hale. Nolaila, ua paniia ka lani maluna o oukou, i haawi ole mai ai ia i ka hau, a ua pau ka hoohua mau ana o ka honua i kona hua. Ua kalua aku la au i manawa wi maluna o ka aina, a maluna o na mauna, a maluna o ka ai, a maluna o ka waina, a maluna o ka aila oliva, a maluna o na mea a pau a ka lepo e hua mai ai, a maluna o kanaka, a maluna o na holoholona, a maluna o ka hana a pau a ko lakou mau lima."