Ka Nonanona, Volume IV, Number 11, 17 September 1844 — Page 60

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." SOLOMONA.
Buke 4. HONOLULU, OAHU, Sepetemaba 17, 1844. Pepa 11.

NO KA HANAI I NA KAHUNAPULE. Helu 6.

Makawao, Maui Hikina, Augate 12, 1844.
                E na hoahanau ekalesia mai Hawaii a Kauai. Aloha oukou a pau loa.
                Ke hauoli nei au i ko'u heluhelu ana ma ka Nonanona, i ka manao ae like o ka ekalesia ma Wailuku, "e hooleia ko Kalaka mau pono a pau a na luna misionari o Amerika i kokua mai ia ia, a na ka ekalesia huipuia ma Wailuku e kokua ia ia ma kana mau hemahema a pau, ma kela mea keia mea e pono ai kona noho ana." Pono loa ia manao. Pela no hoi ko Limaikaika, o kona paipai ana i na hoahanau o Wailuku, e hooko i ko lakou manao ae like; o kona hoakaka ana i ka hana a ka ekalesia mua o Honolulu, a o kona hooikaika ana i na hoalauna a pau e hele a hana like. O ko'u makemake ia, a me ka'u pule i ke ao a me ka po, e hoomau na hoahanau a pau i hoomaka ia hana maikai, i ole e lilo ia mea nui i mea ole. Ua heluhelu paha oukou ma ka Nonanona, i na mea a'u i kakau ai i mea e maopopo ai ka pono o ka hanai, a me ka malama i ka oukou poe kumu. Aole pau ko'u kakau ana.
                Eia ae kekahi mau mea hou aku. E na hoahanau aloha, mai pale aku i ka'u, no ka nui loa o ko'u kakau ana. E hoomanawanui hou aku. E heluhelu me ka noonoo, a me ka manao paa e hana ma ka oiaio, e like me ko ke Akua makemake.
                Eia kekahi mea hou aku e maopopo ai ka pono o ko oukou malama ana, ma na mea o ke kino, i ka oukou poe kumu: He mea ia e nui ai ko oukou pomaikai ma na mea o keia noho ana.
                Aia ma ka buke Hele Malihini o Ioane Buniana, he wahi nane. Meneia.
                "He kanaka maikai no i noho waiwai ai,
                Me kana i hoolei, pela ka nui hou ai."
                He mea pohihihi keia i ka poe hoomaloka. Ua hele lakou ma ka ike maka, aole ma ka manaoio. I ko lakou manao, o na mea a pau i haawiia aku na ka poe ilihune; o na mea i lilo i ka malama kumu, a i ka hoolaha i ka ke Akua olelo, he mau mea poho wale. No ia mea, he poe aua lakou. Aole lakou makemake e hoomanawalea aku na ka poe ilihune; aole lakou makemake e kokua mamuli o ka ke Akua hana; aole lakou manao e hanai i na kahunapule. Minamina lakou i ka lakou waiwai. Ina kokua iki lakou ma kekahi o keia mau mea, kokua lakou me ka oluolu ole o ka naau. He mea kaumaha io i ko lakou manao.
                Aole pela ka poe manaoio i ke Akua, a me kana olelo. I ko lakou huli ana i ka Baibala, ua loaa ia lakou keia mau olelo. Solomona 11: 24 , 25. "Hoohelelei kekahi, a nui hou ae no nae; aua hoi kekahi i ka mea ku ole i ka pono, a o ka nele ka hope." "O ka mea e hoomanawalea aku, e momona ia; a o ka mea e hoomauu aku, e hoomauuia mai oia." Kekahuna 11: 1. "E hoolei i kau berena maluna iho o ka wai, no ka mea, a hala na la he nui loa,