Ka Nonanona, Volume IV, Number 10, 3 September 1844 — HE MAU WAHI MANAO NO KE KIAAINA HOU O HAWAII. Hele 1. [ARTICLE]

HE MAU WAHI MANAO NO KE KIAAINA HOU O HAWAII. Hele 1.

E Leleiohoku e: Aloha oe; No kuu lohe ana, ua loaa ia oe ka oihana Kiaaina, no kela mokupuni nui o Hawaii, nolaila, kupu mai ka manao iloko o'u, e hooili aku i kekahi waiwai nau, ma ka Nonanona, a nana no e halihali aku a haawi ia oe. Ninau mai paha oe, "owai keia kanaka palapala mai ia'u?" Pono no ia ninau, a e hiki no ia'u ke hai aku ia oe, he hoaaloha au nou, a makemake nui hoi au, e pono kou alii ana, a e pomaikai kou noho ana ma keia ao, a e ola mau loa oe ma kela ao. O ke aloha ia oe a me na kanaka o Hawaii, oia ke kuu o kuu palapala ana. No ka mea, he alii opiopio oe; akahi no a loaa ia oe keka-

hi oihana nui, a me ka hanohano, a nolaila, makemake nui au e kokua mamuli ou; a e kuhikuhi pololei aku imua ou, i na mea e pomaikai ai nou, a me na kanaka malalo ou. He elemakule iki wau e noho nei, a loihi no kuu noonoo ana a me kuu imi ana i na mea e pono ai keia lahuikanaka o Hawaii nei; ua loaa iki mai paha ia'u na mea e pono ai, ke malamaia, aole nae pau kuu naaupo. Nolaila, e Leleiohoku e kuu hoaaloha, eia kuu manao mua ia oe, E NOHO PONO MAOLI OE IMUA O NA KANAKA MALALO OU. No ka mea, aia no oe ma kahi kiekie, a ua pau na kanaka o Hawaii i ka nana ia oe, i kou pono a me kou hewa, ke noho nei oe maluna o lakou me he makua la, a ina i pono maoli kou noho ana a me kau hana ana, o kou nani no ia; mahalo ka poe pono ia oe, a kokua mahope ou me ka naau hoihoi, a me ka hauoli; a huli nui paha na kanaka hewa o Hawaii ma ka aoao pono, no ka ike ana i kou pono. Alaila lilo oe i kumu hoohalike maikai no na kanaka, e pomaikai ai. Aka, ea, ina ike na kanaka i kou hewa, he hana kekee paha ma ke kuai, he lawe wale paha, he hoopunipuni paha, inu awa paha, hooluhi wale paha, kapae i ke kanawai paha, o ka nui mai no ia o ka ino; hoomahui koke kou poe luna a me ka poe hewa, a kapa iho i ka hewa he pono, a i ka pono hoi he hewa. A o ka poe pono a me ka naauau, kaumaha loa lakou, ke ike lakou i kou hewa a uwe lakou no ka hewa o ke Kiaaina. Olelo lakou, "ua hina ke kia o ka aina, auhea ka mea e pono ai." Pehea na keiki ke hana hewa ko lakou makua? Aole anei poino? Poino paha, aole poino a koe aku. Pela no na kanaka ma

Hawaii ke ike lakou i ka hewa o ko lakou Kiaaina hou. Nolaila e noho pono maoli oe, imua o lakou, a e hana pololei hoi. E nana mai oe i keia olelo a Iehova, 2 Samuela 23; 81. "O KA MEA E ALII ANA MALUNA O KANAKA, E HOOPONO OIA, E ALII ANA ME KA WELIWELI I KE AKUA. A E LIKE IA ME KA MALAMALAMA O KE KAKAHIAKA I KA PUKA ANA O KA LA; ME KE KAKAHIAKA I UHI OLE IA E KE AO; A E LIKE HOI ME KA MAUU OPIOPIO MAILOKO MAI O KA HONUA, E KUPU ANA MA KA MALAMALAMA AIAI MAHOPE IHO O KA UA." Aole anei akaka ke ano o keia mau hua ia oe? Aole pau kuu manao ia oe; ma kela pepa, pai hou. E malama a e hoomaikai ke Akua ia oe, e kuu hoaaloha. MAKUAKANE.