Ka Nonanona, Volume IV, Number 10, 3 Kepakemapa 1844 — Page 59

1844.) KA NONANONA. 59

lakou mau keiki i ka naauao, e pomaikai auanei keia aupuni ma keia hope aku.
                E na makua mai Hawaii a hala loa i Kauai.
                Ke ninau aku nei au ia oukou, Ua hewa anei ko'u manao maluna ae?
                E hai mai ka mea i manao ino no keia olelo.
                Ua nui no na keiki o keia pae aina i like me a'u nei ko lakou ano, aole no i ike kekahi poe, ua ike nui no hoi kekahi poe, ua oi loa aku ka ike o kekahi poe.
                E nana kakou i ke kula alii ma Honolulu nei, nui ka mahalo o na aina naauao i keia hana; no ka mea, ua manaoia keia poe keiki alii, o lakou no ka poe nana e malama keia aupuni ma keia hope aku, a o ka poe keiki o na kuaaina i hooikaika i ka naauao a nui, o lakou pu ke malama i ke aupuni o Hawaii nei ma keia hope aku, no ka mea, o ka mea naauao ma ke kuaaina, o ko ke'lii hoaolelo ia, kuka pu, a imi pu i na mea e pono ai ke aupuni, aole e launa pu ke kanaka o ke kuaaina me ke lii naaupo ia.
                Aole o ka naauao wale no ko'u wahi manao.
                O ka Puali Inuwai kekahi. E na keiki, e lilo loa kakou i poe inu wai, a e kakauia ko kakou mau inoa ma ka buke i kapaia o "KE OLA O KE AUPUNI" o Hawaii nei.
                Ua nui ka mahalo o na aina naauao, no ka lilo nui ana o keia aupuni i poe Inuwai, a me ka lilo ana o ke lii nui a me kona kuhina, a me na lii a pau malalo iho ona, mamuli o keia hana maikai, ua ike maka au i ka Inuwai i hanaia ma Honolulu nei, olioli nui au me ka mahalo nui i ko'u ike ana i keia mea kupaianaha.
                Aloha nui oukou me ka malu mai ke Akua mai.
                O wau no me ka mahalo,
Na WM. E. MAIKAI.

LAAU KANU.

                Kahaha loa na haole naauao i ke kanu ole ia o na laau maikai ma Hawaii nei. Ma na aina naauao he mea nui ia; nolaila kekahi waiwai a me ka hanohano o ia mau aina. Nui ka pono i loaa mai ma na laau maikai, ke kanuia a nui loa ma keia pae aina; he uliuli maikai ka aina ke nana'ku; he malumalu i ka wa wela; oluolu na keiki i ka paani malalo o na laau malumalu; oluolu hoi ke kanaka luhi ke hoomaha malaila; oluolu ka hana, kui ai, kapili waa, nala moena, ka upena, a me na hana like ma kahi malumalu.
                Ina nui na laau kanu, loaa kekahi wahie malaila; ina hoi he laau hua maikai, loaa mai kekahi waiwai ma ke kuai i na hua.
                Ninau mai paha kekahi poe, "O ka laau hea ka laau pono ke kanu?" Eia, ke hai aku nei au.
                O KA FIKU. He laau maikai ia, a e pono ke kanu nui ia a paapu keia pae aina ia ia. He hiki wawe kona ulu ana a hua mai ka hua; kakaikahi na aina, kahi e ulu ole ai keia laau, ke malamaia. Aole nae pono ma kahi wai ole, a me ka makani ikaika. He mea kuai kona hua; ua waiwai kekahi poe ma Oahu nei i ka hua o ka fiku. Aole waiwai o ka puaa hookahi e like me ka laau fiku hua maikai. A ina he umi laau fiku maikai, he oi aku ka waiwai mamua o ka waiwai i loaa mai ma ka lio. No ke aha ke kanu ole o na kanaka i ka fiku? Aole anei no ka naaupo a me ka molowa? Pono no ke kanu ma na kuauna loi, ma ka pa hale, ma na wahi nihinihi a pau o ke kihapai.
                I ka malama o Ianuari, o Feberuari, a me Maraki, oia na malama pono ke kanu
i ka fiku. O ka lala wale no ka mea e kanuia.
                O KA ALANI. He laau maikai ka alani; uliuli a hanohano ke nana'ku. Ma Kauai he mea nui loa ia; ma na moku e ae ke