Ka Nonanona, Volume IV, Number 10, 3 September 1844 — Page 56

56 KA NONANONA. (SEPATEMABA,

Hawaii ke ike lakou i ka hewa o ko lakou Kiaaina hou. Nolaila e noho pono maoli oe, imua o lakou, a e hana pololei hoi. E nana mai oe i keia olelo a Iehova, 2 Samuela 23; 84. "O KA MEA E ALII ANA MALUNA O KANAKA, E HOOPONO OIA, E ALII ANA ME KA WELIWELI I KE AKUA. A E LIKE IA ME KA MALAMALAMA O KE KAKAHIAKA I KA PUKA ANA O KA LA; ME KE KAKAHIAKA I UHI OLE IA E KE AO; A E LIKE HOI ME KA MAUU OPIOPIO MAILOKO MAI O KA HONUA, E KUPU ANA MA KA MALAMALAMA AIAI MAHOPE IHO O KA UA." Aole anei akaka ke ano o keia mau hua ia oe?
                Aole pau kuu manao ia oe; ma kela pepa, pai hou. E malama a e hoomaikai ke Akua ia oe, e kuu hoaaloha.  MAKUAKANE.

NO KA MAKE EMOOLE O KEKAHI KANAKA MA WAIALUA

Kawailoa, Waialua, Oahu, Au g. 21, 1844.
                E ka Nonanona e; aloha oe, ke hoike aku nei au ia oe i ka make emo ole o kekahi kanaka kaulana i ka hoola aku ia hai ma ka hana kahiko o Hawaii nei, a i keia la 21 o keia malama ua make ia. O Kawainana kona inoa, aole ike ia kona mai a me kona pilikia; eia kana hana i keia la, he ako hale, a pau ia; o ka napoo no ia o ka la, hoi aku la i ka hale kahiko, a puhi i kukui, kamailio no me na kanaka he nui, hoomakaukau iho la i ka ai, o ka ai no ia: he hapa paha o kona maona; alaila, nonoi aku la ia i laau i kana wahine; aole nae i loaa mai ka laau ia manawa, o ka make koke no ia o ua kanaka nei. Kii aku la kana wahine i ke kahuna, mahope o kona make ana, me ka manao aole oia i make loa. Ua hoopaa ia kona hanu e ke akua ulu, aia a hiki mai ua kahuna la nana no e hoala ia ia mai ka make mai. A i kona hiki ana mai pupuhi iho la oia i ka makani ma ka waha o ka mea i make e like me ka hana ana a ke kanaka make i kona manawa e ola'na, aole nae e ola, ua make loa iho la, a kahe mai la ke koko ma ka ihu o ka mea make.
                Auhea oukou e ka poe heluhelu ana i keia kumu manao. Aole anei keia o ka leo o ka Haku e hea mai ana ia kakou, e hoomakaukau ia kakou iho, no ka la e make ai? O keia kanaka o Kawainana, ua kaulana oia i ka hoola i ke kino o hai, aole nae i kaulana i ka hoola i na uhane o hai, a me kona iho. Aloha ino ka mea makaukau ole no ka hele malihini ana i kela ao. E hoomaikai ia ke Akua ka mea nana i kahea mai e hoomakaukau no ka hora ikea ole ia.
Aloha oe.  Na K. HAONA.

NO KA NONANONA. Helu 5.

Makawao, Maui, Hikina, Aperila, 1824.
                E na hoahanau ekalesia mai Hawaii a Kauai.
                Ua pau paha i ka heluhelu ia e oukou na mea a'u i hoakaka no ka pono o ka malama ana i ka oukou poe kumu ma na mea o ke kino. Ua hai aku au ia oukou i na mea eha e maopopo ai ka pono o ia hana. Ano, e hai hou aku au i kekahi mau mea i koe.
                5. Eia ka lima. E malama oukou i ka oukou poe kumu o lilo oukou i poe puni waiwai.
                O ka puni waiwai he hewa nui loa ia. Ua hoakakaia ia mea, ma ka ke Akua olelo. Pule o Davida, penei, Halelu 119: 36. "E hoohuli i ko'u naau mamuli o kou mau kanawai, aole mamuli o ka makee waiwai." Menei ka Solomona: 28: 16. "O ka mea hoowahawaha i ka makee waiwai, e loihi no kona mau la." Eia ka Iesu: