Ka Nonanona, Volume IV, Number 10, 3 September 1844 — Page 54

54 KA NONANONA. (SEPATEMABA,

puni ana a ka pope a me kona luna o Telezela, eha loa kona naau, ua ao nui aku ia i na kanaka e hoole i kela hana ino. O ka hoomaka ana no ia i ka hoole i ka ka pope hana. Inoino loa ka manao o Tetezela a me kona haku ka pope, a me ko ia aoao a pau, imi nui lakou e pepehi ia Lutera a make. Na ke alii, na Federika i hoopakele, ua huna oia ia Lutera iloko o kona hale kaua. Malaila i noho malu ai o Lutera e palapala ana, a e hoomakaukau ana i na olelo kue i ka aoao pope. Ua lawe ia'ku kana mau palapala a nui na kanaka i heluhelu a huli ma ka aoao hoole pope. Ua kokua lakou i kana hana, a mahope iho puka mai la o Lutera mai loko mai o kona wahi i pee ai, a hele e ao nui aku i na kanaka, a me na'lii mamuli o ka olelo a ke Akua. Ua kokua oia a pai iho i ka olelo a ke Akua ma ka olelo kamaaina o Geremania, a heluhelu na kanaka o ia aina he nui loa i ka ke Akua olelo. Malaila ike pu iho la lakou i na hewa o ka poe kumu pope a haalele aku lakou. Ua lawe ia ka Lutera mau palapala ma Beritania a hoolaha nui ia malaila. Nui loa na kanaka ae aku i ko Lutera manao ma Beritania, aka, o ko lakou alii, o Henere VIII, aole ia i ae i ka Lutera, ua huhu loa ia, a pepehi nui iloko no o ke ahi i puhi ia ka poe hoole pope. Aole nae i hiki ia ia e hoopau. Ikaika loa na kanaka o ia aupuni e hoole i ka pope; a make o Henere, haalele loa lakou a kuokoa ia aupuni mamuli o ka olelo a ke Akua. Mai ia manawa a i keia wa e noho nei kakou o ka poe hoole pope ka nui ma Beritania. Ua hookolokolo nui na kahuna pope ia Lutera e make ia, aole i ae aku o Federika i ko lakou manao. Noho hoole pope no o Lutera, a i kona wa elemakule make ia. Make no, aole i pepehiia e lakou.
                Ua pono no ka nui o ko Lutera manao, a me kana mau hana, pela no ka kona mau hoahana maoli o Kalavina ma, aole nae i pono loa e like me ka ke Akua i kauoha.
                Eia kekahi wahi hemahema loa o Lutera, ua hoopaakiki loa iho la ia i kekahi mau hewa o ka poe pope, aole i kuu aku oia ia hewa. O ka berena iloko o ka ahaaina, ua manao o Lutera i ka pule ana a ke kahuna maluna iho o ka berena, ua lilo ia i kino maoli a i koko maoli no Iesu Kristo. Ua ao ia pela i kona wa opiopio e na kahuna pope a manao iho no ia, he oiaio no. Aka, i ka nui o ka lakou hana hewa ua hoole no ia, a ua olelo ia o Lutera ke kumu nana i hoomaka'i i ka hoole pope.

LAHAINALUNA.

Au gate 13, 1844.
                Auhea oe; e ka Nonanona; he pono ia oe ke hoolaha aku i keia wehewehe no ka palapala gula o Hiero ke alii o Surokuse i ninau ia ma ka buke 2; aoao 110, o ka Nonanona.
                EIA UA NINAU LA "Kauoha maila o Hiero, ke'lii o Surokuse, i kona paahana, e hana i papale alii gula nana, i 63 auneke kona kaumaha. Manao iho la ka paahana e aihue i ke kau wahi gula, a e pani i kona hakahaka me ke dala. Hana iho la ia pela, a paa ka papale, haawi aku i ke alii. Haupu iho la ke'lii ua hewa, aole nae i maopopo, no ka mea, ua pono no na auneke, ua 63 no. Haawi iho la ia i ka papale ia Akimede, (he kanaka akamai ia) e huli a maopopo."
                "Hookomo aku la o Akimede i ua papale gula nei iloko o ka wai, a ike iho la, ua pii ka wai 8,2245 iniha paailiono ka pii ana; hoomaopopo hoi ia i ke kaumaha o kekahi iniha paailiono i ka gula 10,36 auneke, a o kekahi iniha paailiono o ke dala 5,85 aune-