Ka Nonanona, Volume IV, Number 7, 23 July 1844 — Page 43

1844.) KA NONANONA. 43.

no kana kane ponoi, ma Kawaihae, ua hala paha i Oahu ano!!" I aku au, "kupaianaha! mai komo wau iloko o ka hihia!" "Aka, eia no ka pepa mare na ka luna mai! aole paha oia i ike i keia mau mea." I mai kela, "ua ike no na kanaka a pau. Maanei no hoi kona noho ana kokoke i ka hale o ka luna!"
                Eia ka hope o ua hana nei. He hoahanau ke kane hou. A hele hou mai la laua, i aku au ia laua. Aole e hiki iki ia'u ke mare ia olua. Aia no ke kane a keia wahine, aole no hoi laua i hemo, a aole maopopo iki i na kanaka, ko ke kane hihia. Nolaila papa loa mai ka palapala Hemolele a me ke kanawai o keia pae aina, aole o keia wahine e mare hou. I mai ua mea la, "aole e makemake ka ia nei kane e noho pu me ia. Ua haalele loa kela ia ia nei a ua hala aku!!" Aole no e hiki ia'u ke ae aku. Nolaila huhu mai la laua a hele koke aku la, me ka i ana e hele maua i ka pope! Ua lohe au, na ke kahuna pope no i mare laua!!
                Eia hou. Haule iho la kekahi wahine iloko o ka moe kolohe, mamua loa, a o kana kane hoi komo pinepine ae la iloko o kela hewa hookahi. Ua loaa i ke kane he palapala mare, nana no i lawe mai. Hoole loa au ia ia, penei, "ke i mai ke kanawai o Hawaii nei, aole oe e mare hou, no ka mea, nou no ka hewa nui, aole no kau wahine, a ua maopopo no hoi i na kanaka a pau, he moe kolohe mau no oe." Aka, ua mareia no e ke kahuna pope! Pono anei, ea?
                Eia hou. Hele mai la he mau mare i keia malama i hala iho nei, me ka palapala mare. Ninau au i ke kane penei, "auhea kau wahine mua?" I mai kela, "aia no ma Kau." I aku au ua okipoepoe anei olua?" I mai ia, "ae, ua okipoepoeia no. I hou au ia ia, "na wai i hana?" I mai ia na maua no!" "I kuu hele ana mai, manao kela e imi i kane hou nana, a nolaila, olelo mai oia ia'u, pono no ia'u ke imi i wahine hou na'u!!" Auwe! aole naaupo i koe! Pela ko'u, aka, no ke aha la, haawi mai ka luna i palapala mare hou ia ia? Olelo aku wau i ua kane nei, "hewa loa keia hana, aole e hiki ia oe ke mare hou!" aka, huhu mai la kela a o kona hele ana aku no ia, i ke kahuna pope nana no ia i mare!
                Eia no hoi. Ua loaa i kekahi wahine opiopio loa i palapala mare nana no i haawi mai ia'u. Hoike iho la au ia ia ma ka heluhelu palapala. Aole i hiki ia ia na olelo elua! Paipai aku au ia ia, "e hoi olua, a o oe ea, e hooikaika nui i loaa wawe ka heluhelu ia oe a e mareia olua." Hoi aku la laua, aole o ka wahine i ao iki. Elua o laua hele hou ana mai e mare. Aole i hiki ia'u ke mare, no ka mea, aole i ku kona ike i ka ke kanawai. Holo aku la laua, "komo i ka pope," a na ke kahuna no laua i mare!
                Nui wale ka hana e like me keia ma Kohala nei. Ke manao nei wau he hana ku e ia i ke kanawai o ke Akua a i ke kanawai hoi o keia pae aina, e nana oe ma Mat. 5: 32; 19: 9, Mareko 10: 11, 12. Rom. 7: 2, 3, Pela ka ke Akua. Nolaila, ua akaka lea, he hana hewa loa imua o Iehova ke hookaawaleia na kane a me na wahine moe kolohe ole. Ke paba mai nei ka olelo a ke Akua i na mea e hana ana i keia hana i poe moe kolohe pu! a pehea la? E pono anei ia makou ke mare i na mea i hookaawale pono ole ia? Aole loa e