Ka Nonanona, Volume IV, Number 7, 23 July 1844 — Page 40

40 KA NONANONA. (IULAI,

                Aka, ea, he wahi hopohopo iki ko'u ma keia hana; eia ko'u wahi mea hopohopo iki, o lilo keia mea nui i olelo wale no, aole he mea oiaio. Ae koke paha kekahi poe, a ikaika ko lakou manao i kinohou a mahope hoowaliwali, a hoomolowa, a haalele i keia hana maikai. Ina pela, ea, o ke kau koke no ia o ka hilahila mai maluna o kela ekalesia, a lilo ia i ekalesia lauwili wale, a me ka hoopunipuni. E na hoahanau ma Wailuku, e ao oukou, o palaka auanei oukou i keia hana a hoi hope ko oukou manao a lilo keia hana nui i makani wale no. E hilinai i ke Akua, a e noi aku i kona Uhane e kokua mamuli o ko oukou manao ae like, i paa nauwe ole, a i mau loa hoi ko oukou ikaika.
                Eia kekahi, ua ae like na hoahanau o ka ekalesia mua o Honolulu, eia ma Kawaoahao nei, e hapai i keia hana: ua ae lakou e pale ae i ko Amerika kokua i ka lakou kumu, a na lakou no e imi kona ola ma neia hope aku. Ua hoihoi no ko lakou naau i keia hana i keia wa, a o ka hana'ku koe. He mea hiki wale no keia ke hana like na hoahanau mai o a o; aole kaumaha iki.
                Eia nae paha ka hewa e pilikia ai keia hana: o ke kokua like ole, paewaewa; kokua kekahi poe, a kokua ole kekahi poe: a o ka poe waiwai kokua uuku wale no, e like me ka poe ilihune. Pono ole pela.
                Eia ka pono e hiki ai, o ke kokua like o na hoahanau a pau loa, a e kokua hoi kela a o keia e like me kona loaa. O ka mea waiwai e haawi e like me kona waiwai, a o ka mea ilihune e like me kona ilihune ana, a e hoana e i kau wahi o ka waiwai i kela hebedoma a i keia hebedoma no keia hana, i waiwai laa no ke Akua, e like me ka Paulo.
                Eia kekahi: pehea na ekalesia a pau ma Hawaii nei? Aole anei e hiki ke hapai i keia hana, a e pale aku i ko Amerika kokua? Pehea ma Lahaina, Kailua, Hilo, Kohala, Hana: Pehea ma Kauai--Waimea, Waioli, Koloa: Pehea ma Oahu nei: ma Ewa, Waialua, Keneohe? Ahea oukou e ku iluna a e hana i ka ke Akua hana? Hanai oukou i na lio, a me na bipikauo, a me na kauwa e ae, a pehea na kauwa a Iehova ka poe malama i na uhane o oukou? aole anei e hiki ke haawi i kau wahi lako no ko lakou mau kino, e like me ko lakou hooikaika ana mamuli o ko oukou uhane? Na oukou wale no e noonoo i keia mea nui.
                Eia kekahi: e heluhelu pono me ka noonoo i na palapala a Gelina: eia ma keia pepa kekahi, aia ma kela pepa mamua kekahi.

KA WAIWAI LILO I NA KULA.

Honolulu, Iulai 9, 1844.
                E ka Nonanona e, aloha oe, he wahi olelo ka'u e haawi aku ia oe, a nau e hoike aku i na pepeiao o ka poe lohe.
                Eia ua olelo la, o ka nui o na kumu kula a pau ma keia mokupuni Oahu nei; he 153 lakou. O na dala i lilo i keia poe i ka la hookahi $21,62. Aole nae i like ka uku ana o na kumu a pau, he 25 keneta ka kekahi, a he 18 ka kekahi, a he 12 ka kekahi, a he 6 ka kekahi: nolaila mai kela $2162. O ka $21.62 X 5= 108:10 no ka hebedoma hookahi ia: $108,10 x 4 = 432,40 oia ko ka malama hookahi, elua malama i lilo i ka hoomaha a koe iho he 10, oia hoi, o 432.40 x 10 = 132,400, oia na dala o ke aupuni i lilo i na kumu i ka makahiki hookahi ma Oahu nei.
                Eia na luna kula a puni Oahu nei, 307 lakou: o na dala i lilo i keia poe i ka makahiki hookahi, $2,763. O keia mau dala i lilo i na luna kula maluna ae nei, no na la paahao mai: no ka mea, he hapawalu ka ke kanaka i ka la paahao hookahi, a he 36 la hana i ka makahiki hookahi, a pela no hoi na la o na konohiki i lilo i na luna, nolaila 9 dala i lilo i ka luna hookahi i ka makahiki hookahi, $1,50 no ko ke alii mau la $4,50 no ko na konohiki mau la.
KEAKA.