Ka Nonanona, Volume IV, Number 6, 9 Iulai 1844 — Page 36
36 KA NONANONA. (IULAI,
i lilo i poe hoahanau. Ua like ke ao ana me ko ke Kulanui ma Wailuku a me Lahainaluna; aole nae holo loa iloko o na mea paakiki loa e like me L. luna.
KULA KAIKAMAHINE MA HILO. O Koanawahine ke kumu; na na hoahanau ma Hilo e kokua ka nui o ka ai. He 26 na haumanu; ekolu o lakou i mare i ke kane, 21 o lakou i komo iloko o ka ekalesia.
KULA HANAI NO NA LII. O Kuke laua me kana wahine na kumu. Ma ka olelo Beritania wale no ko lakou ao ia ana. Na ke aupuni e malama keia kula, a hoolako iho i kela mea, keia mea e pono ai. Ua maikai kona ano i keia wa; hoolohe na haumana, a holo mua ma ka naauao.
KULA MISIONA RI MA KA PUNAHOU. O Dola a me Kamika wahine, a me Rise laua me kana wahine na kumu. He 24 na haumana iloko o ia kula. No na misionari Amerika wale no keia kula.
NA KULA I WAEIA. Aia ma Waioli kekahi, no Ioane. He 63 na haumana. Aole ia he kula hanai. Hooikaika na haumana i ka hana a mailaila mai ko lakou wahi lako: kokua na hoahanau kekahi.
Ma Hilo kekahi kula i waeia. He 70 na haumana, a o Wilikoke ke kumu. Ua hele nae paha oia i Waialua e noho ai.
MA KOHALA KEKAHI. O Bona ke kumu; he 12 na haumana; he kula no na kumu ao kekahi malaila.
MA HANA KEKAHI KULA WAEIA. O Rise ke kumu: ua hoi nae ia ma ka Punahou i keia wa. He 30 na haumana mamua iho nei.
NA KULA LIILII. Ma keia pae aina 330 na kula; 270 na kumu ao; 12,762 haumana; 4,000 na kamalii ike i ka heluhelu; 2,100 ka poe kakaulima; 5,800 ka poe ma ka helu; 1,850 ka poe ma ka hoikehonua.
MAKE I KA WAI.
Ua make iho nei, i ka la 12 o Iune, o Keohokakai, ke keiki a Kanakanui. Penei kona make ana; ua ae aku kona makua ia ia e hele i ka auau; hele ke keiki i kahawai; lele aku no ia i ka wai, iluna ke alo, o ka make no ia. Ike kona mau hoa auau, ua make o Keohokakai, kahea laua, kahea nui, a ike aku i ua keiki nei e waiho ana iloko o ka wai; ku koke aku la, huki ae la; nanaia iho la, ua lapuu ka welau o ke alelo iloko, kaheaia aku la e koha mau makua, aole ekemu mai ke keiki, aole oni ae; ua hoi aku la kona uhane i kona kumu o ke Akua, a ua hoi ke kino i ka lepo i kona kumu. Aloha olua na makua pilikia.
ELIA KIHA.
NA MEA HOU.
I ka la 5 o Iulai nei ku mai kekahi moku kalepa mai Bolabola mai; i ka la 14 o Iune kona holo ana mai. Aia ma Bolabola ia la ka moku kalepa, o Globe; me na misionari Amerika 7 a me na haole e ae maluna iho, e holo mai ana i Hawaii nei. Ua oleloia, o ka la 17, oia kona la e holo mai ai: o ka hiki mai koe paha.
Aia no hoi ilaila ka manuwa Amerika, o Warren kona inoa; eia ae ke holo mai nei.
Aia no hoi ma Bolabola, na manuwa Beritania elua, aole nae i hiki ke komo iloko o ke awa, no ka ae ole e kani na pu aloha i ka poe Farani malaila. Ahea la pau ka pilikia ma kela pae aina? Aloha ino lakou!
Eia kekahi; ua ili malaila, ma Papaete, kekahi moku kalepa Farani, he moku nui, a palemo loa ilalo; he 10 anana ka hohonu o ke kai ma kahi i poho ai: 400 tona nanahu maluna iho, a me ka waiwai kalepa i ku i na dala he $12,000. He oiaio no, he mau eheu ko ka waiwai e lele wale aku.