Ka Nonanona, Volume IV, Number 6, 9 July 1844 — Page 33

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." SOLOMONA.
Buke 4. HONOLULU, OAHU, Iulai 9, 1844. Pepa 6.

NA KA HANAI I NA KAHUNAPULE. Helu 1.
Makawao, Maui Hikina, Maraki 13, 1844.

                E na hoahanau ekalesia mai Hawaii a Kauai. E alohaia mai oukou a pau loa, e maluhia hoi e Iesu Kristo ko kakou Haku e ola'i.
                I ko'u aloha ia oukou a pau loa, i ko'u makemake i noho pomaikai na ekalesia o keia pae aina, me ka maemae, a me ka naauao, a me ka ikaika; a i ko'u makemake i hoolaha koke ia ka olelo a ke Akua ma na aina a pau loa, nolaila, ke palapala aku nei au ia oukou. He wahi mea ninau ko'u ia oukou. Eia, aole anei he pono oukou e malama, ma na mea o ke kino, i ka oukou poe kumu, i na kahunapule, a me na kumu ao, a e kuai hoi i ko oukou buke, e like me na ekalesia o na aina malamalama?
                I ko'u manao, he mea pono io e hana pela na hoahanau a pau mai Hawaii a Kauai, me ka hilinai ole maluna o na ekalesia o na aina e. Ma keia palapala, ke manao nei au e hai aku ia oukou i na mea e maopopo ai ka pono o ko na hoahanau ekalesia o Hawaii nei malama ana i ka lakou poe kumu. Ke noi aku nei au ia oukou, e heluhelu i keia palapala me ka noonoo, a me ka pule i ke Akua, a me ka manao paa e hana mau mamuli o ko ke Akua makemake.
                1. Eia ka mua: He poe aie nui na hoahanau ekalesia Hawaii na ka lakou poe kumu.
                He poe aie nui oukou na ka oukou poe kumu, no ka euanelio a ka Haku i haiia'ku ai e lakou? E noonoo oukou i ka mea e lilo ai oukou he poe aie maoli. Ina hele oukou i Lahaina, i Honolulu paha, i ka hale kalepa, a malaila, i loaa mai ia oukou ka lole paha, ke kilika, ke kapa komo, na pahi, koi lipi, ipu kukui, na pa, a me na kiaha; na kamaa, na kahi, na kuikele, pina, lopi, ribine a me na mea e ae, aole anei oukou he poe aie? Ae mai oukou, "ae, he poe aie no." No ke aha? I mai oukou ia'u, "He mau mea e waiwai ai makou keia mau mea kuai; he mau mea e oluolu ai ko makou kino, no ia mea, he poe aie makou.
                Eia kekahi: ua kuai na haole i ka lakou mau mea kalepa, hoolimalima moku, a halihali mai i Honolulu, a i Lahaina paha, no ia mea, aole hiki ia lakou ke haawi wale mai i ka lakou waiwai.
                Ina hele mai kekahi kahuna lapaau akamai, me na laau o kela ano, o keia ano, me na pahi o lima, a me na pahi olo i mea e oki ai ka wawae a me na lima; a me na mea e hemo ai na niho, a me na mea e ae e lapaau ai. Ina e lapaau pinepine oia i na kanaka, aole anei oukou he poe aie? Ae mai oukou ia'u, "ae, he poe aie no." No ke aha? I mai oukou, "Nui paha kana waiwai i lilo kona hoomakaukau ana e lilo i kahuna lapaau, i kona noho ana ma ke Kulanui; a nui ka waiwai i lilo no no ka palapala lapaau, a nui ka waiwai i lilo no ka laau lapaau. A nui no hoi na kanaka i hoolaia e ia, no ia mea, aole pono e lapaau wale ia. He poe aie no ka poe i lapaau ia