Ka Nonanona, Volume IV, Number 5, 23 June 1844 — Page 32

32 KA NONANONA. [IUNE,

                O ka poe a pau i manao e malama pono i ka manawa e kuai i waki i ike pono oia i ka manawa i poho a me ka manawa i poho ole, a me ka manawa hana ia, a me ka manawa hana ole ia.
                No ka mea, o ka manawa i hanaia, oia ko ke kanaka pomaikai e hiki mai ana, o ka manawa i hana ole ia, oia ko ke kanaka poino e hiki mai ana.
                Nolaila, o ka manawa i hana ole ia, ua like no ia me ka waiwai i aie ia, aole nae i ukuia mai, no ka mea, o ka manawa kanu, e hiki mai no ka manawa ohi, o ka manawa kanu ole, e hiki mai no ka wa nele.
                Pela no ka wa i hana ole ia e hiki io mai no ka nele maluna o ka poe a pau i hana ole, ke i mai la ka palapala Hemolele, Iakoba, mokuna 2, pauku 26. "O ke kino uhane ole e make no ia, pela no ka manaoio hana ole e make no ia, e nele no ia."
                O ka poe imi waiwai a pau e pono lakou, e malama i ka manawa, a e hoolilo i kekahi manawa ma ka haipule, oia ka mea e pono nui ai ka uhane mahope mau loa aku. Eia ka manao i hoopuka ia.
                Ma ka imi ana i ka waiwai e noonoo e mua i ke Akua, no ka mea, aia no ma kona lima na waiwai a pau, nana no i waiho na waiwai ma kela aina a ma keia aina i pomaikai kela lahuikanaka a me keia lahuikanaka.
                Nana no i waiho na waiwai ma keia ao, a ma kela ao, i pomaikai ko keia ao, a me kela ao.
                Nolaila, o na mea a pau a ke Akua i waiho ai ma keia ao, he mau waiwai maloko olaila, ua huna ia maloko i loaa ole i ka poe hana ole, aka, e loaa mai no i ka poe hana me ka hooikaika, a me ka hou o ka lae.
                Nolaila, e noonoo kela mea keia mea ma kana hana iho, no ka mea, o keia mea a ko kakou mau lima e hana aku ai e lilo ia i waiwai no kakou.
                O na mea a kakou i manao ai he waiwai ole, he oiaio no, he mea waiwai ole io no na mea a pau ke hana ole ia, aka, i hana ia, he mea waiwai nui no: he mea waiwai ole ke kai, he waiwai no nae i ka mea hoohahapaakai, pela ka lepo, he mea waiwai i ka poe hana lepo, pela kela mea keia mea a kakou e hana ai.  DAVIDA MALO.

KA NOHO ANA O KE KANAKA POMAIKAI.

                Ua hanau ia ke kanaka pomaikai iloko o ke kulanakauhale o Kahoohanau houia, a ma ka haawina o ka inihi ola. Ua aoia oia ma ke kula o Kahoolohe, a ke noho la oia ma ka papu o Kahoomanawanui; o ka hoomau i ka hana, oia kana oihana. Ua nui no nae kona waiwai ma ka aina o Kanohooluolu, a hoole pinepine oia, i kona pono iho, i mea e pono ai o hai. Aahu oia i ka aahu o ka naau haahaa. He aahu maikai loa ae kona, ke hele oia i ka ahaolelo alii. Ua kapaia ka aahu o ko Kristo pono. O ka pule ma ka naau, oia kana ai i ke kakahiaka, a me ke ahiahi. He berena kana e ai ai, i iko ole ia e ko ke ao nei, a o kana mea e inu ai, oia ka waiu aiai o kana olelo. Pela no oia e noho pomaikai ai, a pela no hoi oia e make pomaikai ai. Pomaikai ke kanaka i hoopiha ia i ka ae oluolu, e hooponopono ana i kona mau manao, e hoomaemae ana i kona naau, e amo ana i ka auamo a Iesu ma kona ai, a e hehe ana i ke ao lapuwale malalo iho o kona wawae. Pomaikai ka noho ana o ua kanaka nei.