Ka Nonanona, Volume IV, Number 5, 23 Iune 1844 — Page 29

1844) KA NONANONA. 29

nana i hana. O kona mau kaikuwahine elua kekahi huipu me ia ma keia hana hoohelelelei loa laua i ka laua waiwai io a ia nei, e kokua i ka ke Akua hana.
                Hanohano na ekalesia ke pau loa na hoahanau waiwai i ka manawalea e like me keia: holo loa na hana maikai a pau, a piha koke na wahi pouli o ka honua nei i ka malamalama, a hauoli hoi na anela nani o ka lani.

HE HOOKOLOKOLO HAOLE.

                Ua hookolokoloia ke Kanikele kahiko no Beritani, o R. Charlton ma Honolulu nei, i ka la 18 o Iune nei, no ke aki wahahee ia George Pelly. Olelo oia ua moe aikane ua Pelly nei, a nolaila ua hookolokoloia, a ua hooukuia oia i $3,450. Ikaika ka paio o na haole ma keia ahahookolokolo, ma kela aoao, a me keia aoao: aole nae he ino ka hana: ua pololei no; ewalu haole i noho jure, a ua ae like lakou i ka hewa o Kanikele. He mea keia e makau ai ka olelo ino. E malama i ke alelo, no ka mea, he lala kolohe ia.

KAHUKULA HANA KEKEE.

                E nana pu kakou i keia olelo paio malalo iho; ina he oiaio keia hoike ana no ke Kahukula ma Kauai; ina ua maopopo loa ka mea e make ai na kula ma Kauai. Ma Kauai wale no paha keia hana kekee; ma na aina e ae kekahi paha. Pehea ma Hawaii? ma Hilo, PUna Kau, Kona, Kohala, Hamakua, a me Waimea? Pehea ma Maui, a me Molokai a me Oahu? Ua ikea anei ka hana kekee a na Kahukula ma ko oukou wahi e like me kela hana ma Kauai?
                Ua hema nae kela Kahukula ma Kauai, a ua lilo kela oihana maikai ia Kahookui; a ua oleloia he maikai kana hana.
                Ua hemo iho nei ke Kahukula ma Hilo. No ke aha la? Ua hewa anei kana hana ana? Ina ua hewa, heaha kona hewa?
                Aloha oe e Nonanona, ke halawai aloha nei me oe. He manao hoakaka i ka ino o ka hana ma Kauai nei.
                Eia ka manao malalo iho, e hoike mai ana i ka manao o ke kumu a me ke Kahukula, o Kaelemakule no ia: Penei ka hoakaka ana.
                KUMU. E ke Kahukula e, eia mai ke lii ke hele aku la i Koloa, e haawi mai oe i ko makou dala.
                KAHUKULA. A ike ke Kahukula i keia palapala noi dala a na kumu, alaila, kauoha mai oia e hele wikiwiki mai oukou a e haawi aku no au.
                KUMU. A hiki na kumu i kahi o ke kahu, nonoi aku na kumu i ko lakou dala, alaila; hookolokolo mai la ke Kahukula; i ka hora a me ka manawa a me ka la i poho i na kumu, aole i loaa.
                KAHUKULA. A e haawi aku no au ia oukou, aka, e uku mai oukou i ka hapaumi o ko oukou waiwai ia'u.
                KUMU. No ke aha makou e uku ai ia oe?
                KAHUKULA. No ka nui o ka'u hana; i ka wa mamua, aole nui o ka'u hana, eia wale no o ka haawi aku i na palapala ia oukou, a, ia oukou aku no ia me na luna. I keia wa na'u e imi aku ka waiwai no oukou mamuli o ko'u ikaika iho.
                KUMU. Nawai ka hana i haawi a nui ia oe; e hoike mai oe.
                KAHU. Ka'u no a me ke Kiaaina, na maua i noonoo pu i mea e pono ai na kula. No ka mea, nui ko'u makemake e maikai na kula, aole o'u makemake nui ma ka uku; aka, makemaka au i holo ka maikai o ke aupuni ma kela wahi keia wahi.
                KUMU. Pehea la makou e uku aku ai ia oe, no ka mea, aole na makou ka hana i haawi aku ia oe, i ko makou manao, aole na makou oe e uku.
                KAHU. Ina aole oukou e uku mai ia'u, aole au e haawi aku ia oukou i ke dala a me ka waiwai, e hoi oukou a oki aku i na opala a na luna.