Ka Nonanona, Volume IV, Number 5, 23 Iune 1844 — Page 25

KA NONANONA.
"E ka mea hiamoe, e hele oe i ka nonanona, e nana i kona aoao, a e hoonaauao iho." SOLOMONA.
Buke 4. HONOLULU, OAHU, Iune 23, 1844. Pepa 5.

BATIMEA PUAAIKI.
MOKUNA IV.

                Aole ikeia ka ikaika o ka ekalesia ma ka lehulehu o na mea i komo, aka, ma ke ano oiaio. Ua ikeia, i kekahi manawa, he mau mea haipuleio, ma na aina pegana. Oia ka mea i oleloia ma ka ke Akua olelo. Ke ano o Batimea. Molowa ole i ka hana. Makau i ke Akua. Ikaika ma ka manaoio. Makemake i ka Haku, i kana olelo, a me kona hale, ka naau haahaa.
                "Ina iloko o Kristo kekahi kanaka, he mea hou oia; ua hala aku la na mea kahiko, aia hoi, ua ano hou ae la na mea a pau."
                O keia olelo moakaka o ke Akua, he mea paha ia e make ai ka manaolana o na hoahanau ekalesia he lehulehu. Ina pela, pela io no. "E hooiaio ia'ku ke Akua, ke hoopunipuni na kanaka a pau." Aole pono e hoole i keia olelo no ka makemake o ka poe hoahanau, a me ka poe kuhihewa ma na aina Kristiano, a me na aina pegana. Aole i ikeia ka ikaika o ka ekalesia ma ka lehulehu o ka poe ka i komo, aka, ma ka oiaio, a me ka maemae o na hoahanau. "O oukou ko'u mau hoaaloha," wahi a Iesu Kristo, "ke hana oukou i na mea a'u e kauoha nei ia oukou." Aole nae e pono ka poe nana e kukulu i na pa o Ierusalema e makau o make hewa ka lakou hana ana a pau loa ma ke kukulu ekalesia ana. Nui no paha e kukulu ana, he laau, he mauu, he opala, a e hooleiia lakou iloko o ke ahi, i ka la i hoaoia ka lakou hana. Aka, nui i koe, aole e pau i ka puhiia. Eia ka Iesu olelo, "He nui ka poe e hele mai, mai ka hikina a me ke komohana mai, a e noho pu lakou me Aberahama, a me Isaaka, a me Iakoba iloko o ke aupuni o ka lani." A ua hoikeia mai, ma ke Kauoha Hou kekahi mau mea haipule loa, aole nae lakou i noho ma na aina malamalama loa. Pela ka lunakanawai ma Kaperenauma, he kanaka Roma ia. Pela ka wahine o Kanaana i olelo ia ma Mataio 15: 21-28. He wahine Helene ia, no ka aina o Poinikia, he aina pouli no ia. Aka, ua mahaloia laua no ka ikaika o ko laua manaoio. He oiaio no, "aole ke Akua i manao mai i ko waho o ke kanaka. Aka, ma na aina a pau, ua oluolu ia i na mea i makau ia ia, a me ka hana pono." O "ka olelomaikai no Kristo, o ko ke Akua mana ia e ola'i, no kela mea, keia mea manaoio, no ka Iudaio mua, a no ka Helene hoi. I ka la nui, ka la hookolokolo, e ikeia paha kekahi mau momi nani loa iloko o ko Iesu leialii, no Aferika paha, no ka Aina Omaomao, no ka aina nahelehele o Amerika paha, a no na aina o ka Moana Pakifika paha. O Batimea kekahi o lakou i ka manao o ka poe i ike ia ia. I ikeia ke kumu o keia manao, pono e heluhelu i keia mau mea e maopopo ai kona ano haipule.
                He pono paha e olelo maanei i keia mea oiaio. O ka lokomaikai o ke Akua ma kona hoohanau hou ana i kona naau, oia ke kumu o ko Batimea pono a pau loa. Aphe kumu e ae. I ko Iesu nana ana i ke kanaka ui i olelo ia ma Mareko 10: 12. "Aloha iho la," aole no kona ano