Ka Nonanona, Volume IV, Number 1, 30 April 1844 — Page 6

6 KA NONANONA. (APERILA,

inoa, alaila, hewa loa kela kii ana. Ua maopopo keia ma ka oihana o na aina e.

                Eia hoi kekahi, o ke kumu lua keia, no ka lohe pono o ke kapena ua holo ka Makai Nui i kai, a ua hoole ka malama moku i ka laweia; mai o ke keiki, a ua hoi mai ka waapa e hoakaka i ke Kiaaina, alaila, palapala aku ke kapena i ka malama moku, "mai haawi oe i ke keiki." Hu hewa keia palapala a ili mai la iloko o ko'u lima, malaila ikea ke kue maoli a me ka hoino a me ka hoole hou o ke kapena, ua mopopo ma kana palapala. Oia hoi ke kumu o ka hoouku ana ia ia, e like me na olelo a ke kanawai Mokuna 25.

                Ua pono paha keia hana ana a pau a me ka hoopai ana, aka, he makalii loa ka imi a me ka noonoo ana e hiki pono ai ka hoaponoia. M. KEKUANAOA.

KA NONANONA.

Honolulu, Aperila 30, 1844.

Nonanona o ka makahiki hou.

                O ka pepa mua keia o ka Nonanona, no ka makahiki eha, a me ka Buke eha. Nani ke ola loa o keia wahi naonao makalii; kokoke paha kona wa elemakule. He oi aku kona ola i ko ke Kumu Hawaii, a me ko ka Lama Hawaii; ekolu makahiki, ko ke Kumu Hawaii, a hookahi wale no ko ka Lama Hawaii, a make laua, a ke holo nei ka Nonanona iloko o ka ha. No ke aha kona ola loa? No ka makemake ia mai wale no. He mau pepa maikai ke Kumu Hawaii a me ka Lama Hawaii, aka, ua hoowahawahaia laua e kanaka, a nolaila, ko laua make koke. Ua lilo laua i opala wale no iloko o kela hale keia hale, a ua hanaia kekahi i lupe, a o kekahi i wahi opeope, a ua waiho wale kekahi. Aole like loa pela ka Nonanona; pela no nae kekahi; aka, ua mahuahua ka makemake o na kanaka i ka naauao i keia wa. Pololi maoli a me ka makewai kekahi poe no ka ike a me ka naauao,i keia manawa; a nolaila, huli nui lakou i ka Nonanona, i ike lakou i na mea hou, a me na mea maikai. He pono keia, aole nae he nui Ka iini i ka naauao, a me ka ike, nolaila, aole heluhelu nui i ka Nonanona. Eia ka pono, o ka poe lawe i keia pepa, e heluhelu a pau loa, me ka noonoo, a me ka hoomaopopo, a pau ka heluhelu ana, e malama, a humu pu, i mea heluhelu ma keia hope aku. Mai waiho wale, a lilo i o a nei.

                Eia kekahi; o na makua mea keiki ike, e lawe i ka Nonanona no lakou, i mea e naauao ai lakou i ka wa opiopio.

                Eia kekahi; o ka poe lawe i keia pepa e uku pono mai iloko o na malama ekolu. Mai hoopanee, mai

hoopoina hoi.

                MOKU HOU. I ka la 23 o Aperila nei, ku mai ka moku kalepa, o Lausanne kona inoa, mai Amerika mai, a ua lawe mai i na palapala he nui a me kekahi mau haole hou. O George Gary, he kahunapule, he luna no kekahi aoao misionari ma Oregona kekahi, a o Mi. Benson, he malama waiwai no ko Amerika mau manuwa kekahi; a he mau haole e ae kekahi, aole loaa na inoa.