Ka Nonanona, Volume IV, Number 1, 30 ʻApelila 1844 — Page 5
1844.) KA NONANONA. 5
Eia kekahi ninau, pono anei ke ao aku kekahi mau kahuna pule, i na kanaka o keia pae aina, e ku e i ke kanawai, a e haalele i na kula aupuni, i noho wale lakou ma ka naaupo? No ka mea, aole hele ka ka poe ku e kuu mau keiki i na kula e: kainoa ua pono ke malama ia ke kanawai o keia pae aina e ko Hawaii nei a pau loa. Pehea la kou manao? Aka e pono ia'u ke oki aku i keia palapala, o paupauaho oe no kona loihi. He wahi manao i koe no'u, a e launa hou paha kaua auanei. BONA.
NO KA MOE KOLOHE. HELU 3.
Kahaha mai paha kekahi poe me ka ninau.-- "No ke aha la ka pai pinepine ana no keia hewa hookahi? Ua hoike e mai kekahi Kahu ekalesia i kona manao a me ko Iehova manao no keia hewa, Ma ka Nonanona, Buke I. Pepa 12. 13, 16. Buke II. Pepa 3, 4, 5, 9. Pela no, a ua maikai hoi kona hoike ana, a pomaikai hoi ko Hawaii nei, ke heluhelu pinepine lakou malaila, a e malama no hoi.
O ko ke Akua makemake no ia. Pela mai no ke Kaula o Isaia, "He lalani maluna o ka lalani."' Aole o'u manao e hooloihi aku i ko'u manao no ke ano, a me ka ino loa o keia hana hewa ana o oukou, malama paha, ua akaka lea ka mai a me ka make o ke kino a me ka make pu o ka Uhane. Pehea la e hoopau ai kakou i keia hewa nui o Hawaii nei? Malaila no, ka nui o ko'u noonoo ana i keia mau makahiki i hala iho nei. Makehewa ka hoike ana i na mea e pau ai, ke ole oukou e malama, a e hooikaika pu me makou e pau ai. Mai manao oukou na makou wale no e hoopau ai. Aole pela ka pono. He hana keia na ke Alii a me na'lii, na oukou hoi na makua, na kumu, na kamalii a me na luna a pau.
1. O ka kau ana o na'lii i na kanawai, a me ka hoopai ana i ka poe a pau i hihia i keia hewa. Ua maikai na kanawai i kauia, O ka hooko ana o na'lii a me na luna i keia mau kanawai, oia ka mea nui i koe. Aole no ke kau ana i na kanawai wale no ma ka hana ana a lakou i na mea e akaka'i ko lakou maemae Ina paha, e hana lakou e like me kekahi Alii kahiko, alaila, ua pono. Peneia kana, Kau mai la oia i kekahi kanawai, "Mai moe kolohe." Ina e hihia kekahi mea i keia kanawai, alaila e poaloia'e kona mau maka elua. A o kana keiki ponoi, ka mea mua i hihia ai, a pehea? a pahea la hoi; ua hoopakele anei oia i kana keiki? Aole. Ua oi aku kona manao i ke kanawai i kona manao i kana keiki, aloha nui no nae oia i kana keiki; nolaila, poalo ae oia i kekahi maka ona, a me kekahi maka o kana keiki. Nani kona aloha i ke kanawai! a ma keia hana ana ka maopopo o kona manao. NA KUKE.
Honolulu, Aperila 20, 1844.
NO KE KEIKI A KAEO.
E ka Nonanona; Ike au ma kou helu 21, Aperila 17, aia malaila kekahi olelo ana no ka hana a kekahi moku okohola.
He mau mea nui i koe o keia hana a'u e hoakaka aku nei. Eia ke kumu mua; He keiki, he 14 wale no kona mau makahiki, a nolaila pono ole ia ia ke haalele i na makua, a me ke kumuao palapala, aole hoi e niki ia ia ke kakau i kona inoa ma ka palapala holo moku me ka ae ole o kona mau makua. Nolaila ke kii ana aku i ke keiki. Aka, ina he kanaka makua ua noho ma ka moku me ke kakau pono i kona