Ka Nonanona, Volume III, Number 23, 2 April 1844 — Page 227

1844.) KA NONANONA. 227

lakou naau; a pela no hoi na makua, ua oluolu.
          Eia ka mea e oluolu ai na makua ma Honolulu nei i keia wa, ua hoopauia ko lakou uku ana i na kumu. He pono maoli keia, no ka mea, ua hooili wale ia keia kaumaha maluna o na makua, aole ma ke kanawai. O ka hele ana o na makua i ka paahao, o ko lakou kokua no ia i na kumu. Aia iloko olaila ka waiwai, e pono ai na kula a pau loa, a no ke aha la e hookaumaha hou aku i na makua? Uoki keia hana, a ina manao na makua e kokua aloha i na kumu, no lakou ia; he pono no ia.
            Eia kekahi; he wahi ninau ia Kaiana ma Hilo. Heaha ke ano o kela mau hua ma kau palapala, "o ka hookuke ana'ku i ke kumu a me na kumu, me ka hewa ole i ku ma ke kanawai kula." Heaha la ke ano o keia mau hua? Ua hookuke wale anei ke Kahukula ma Hilo i na kumu ao? E hai pololei mai oe, i akaka; ina ua hana pela e hiki no ia'u ke hoike aku.

HE MAU MEA HOAKAKA.

            Ua haawiia keia mau palapala i na Kiaaina a pau o keia Pae aina.
          Na ka Mea Hanohano M. Kekuanaoa, Kiaaina, Oahu.
          ALOHA OE. Ua Kauoha ia mai au e ka Moi, e hoakaka aku ia oe a i na Luna nui a pau o ke Aupuni, i ka lilo ana ma ka la 9 o Maraki nei, o John Ricord, Esq, he kanaka Hawaii nei i mea nana e hana i ka Oihana Kokua kanawai Nui, a e hoakaka i ka pono o ka hana ma ke kanawai ke kii mai na Luna Nui a pau o ka Aupuni o ka Moi ia ia, ma na Oihana a pau o ka imi kanawai, o ka hooko hoi a me ka hookolokolo. A ina manao oe ma kau Oihana Nui, e kokua mai oia ia oe ma na kanawai haole, a me na kanawai maoli paha, e pono ia oe e ka Mea Hanohano ke kii mai ia ia nei.
Owau no me ka Mahalo, kau kauwa hoolohe, (Inoa,) G. P. JUDD.
          Honolulu, Maraki 9, 1844.

            Honolulu; Mokupuni, Oahu, Aupuni o ko Hawaii Pae Aina.
          Ua hoohikiia o John Ricord, no Honolulu, he kanaka ua hooliloia malalo iho o ka Moi, ke Lii o ua Pae Aina nei, olelo mai la oia ma keia hoohiki ana, e hana pono oia, me ke kolohe ole a lilo ke akamai a pau iloko ona i na hana a pau o ka Oihana i kapaia ke kokua na Luna kanawai Nui o ua Aupuni nei e like me ke Kumu kanawai a me na kanawai, e like hoi me ka palapala hoolilo a me na kauoha i haawiia aku ia ia, a kakauia i ka la 9, o Maraki, M. H. 1844.
(Inoa,) JOHN RICORD.
Kakauia, a Hoohikiia i keia la 9, o Maraki M. H. 1844. Imua o'u.
(Inoa,) M. KEKUANAOA.

          Honolulu, Mokupuni, Oahu, Aupuni o ko Hawaii Pae Aina.
          O ka mea i kakauia ka inoa malalo nei, he kanaka o Amerika Huipuia, ma ka hanau ana, a ua noho iho nei ma Nu Ioka; ua hoohiki maluna o ka Euanelio Hemolele, a ma keia hoohiki ana, olelo mai la, E kokua mau no wau i ke Kumukanawai, a me na Kanawai o ko Hawaii Pae Aina; e lilo maoli no wau i kanaka no ka Moi, Kamehameha III ke Lii, a ma keia ke haalele aku nei au i kuu pili ana i na Aupuni e ae a pau, a ia Amerika Huipuia no hoi.
(Inoa,) JOHN RICORD.
Kakauia, a hoohikiia i keia la 9, o Maraki, M. H. 1844. Imua o'u.
(Inoa,) M. KEKUANAOA.