Ka Nonanona, Volume III, Number 23, 2 ʻApelila 1844 — Page 224

224 KA NONANONA. APERILA,

mai no i Wailuku. Ia mau makahiki, ua mahuahua ko'u ike ana ia ia, a e like me kuu ike ana ia ia, pela kuu mahalo, a me kuu makemake, a me kuu aloha. Kakaikahi na hoahanau a'u i ike ai, i mahuahua ko lakou aloha ia mai, a me ko lakou ike ana aku i ka Haku ia Iesu Kristo me kona. I ke Akua ka hoonani ia. Amene.

KE KUHIHEWA O LELEIOHOKU.

Lahainaluna, Maraki 19, 1844.
          Auhea oe e Leleiohoku, o oe kekahi i hoakaka mai, me ka manao hoopono aku i ka hana a na luna i hoakakaia ma ka Nonanona 19, ua hihia oe malaila, a ua hilinai hewa, me ke kuhihewa ma ka aoao o na luna, he pono. Aole pono na luna i ko'u manao.
            Auhea oe, ooe ka mea nui i waena o na kanaka a pau; e pono ia oe e wehewehe pono i ke ano o ke kanawai, a kuhikuhi pono i ke ano o ka hana a na luna, i hiki i na luna ke hana pololei i ke kanawai o ke aupuni, me ka hookaumaha ole aku i na kanaka. Eia ka! o oe ka mea hookekee i ke kanawai a alakai hewa hoi i na luna.
            Eia ka manao hoapono i kela luna hewa, ma ka aoao 18, o ke kanawai, aole like me ka aoao 23 o ke kanawai, ua ku e kekahi i kekahi, aole i like ka auhau.
            Aole pono na luna e hapai i ke kanawai o kekahi oihana, a kau maluna o kekahi mea e, he mea ia e huikauai.
          O ke kumu kanawai ma ka aoao 18, no ka auhau no ke kino, o na kane me na wahine me na keikikane, i hala na makahiki 14, a me na kaikamahine.
          Ua paa ia auhau maluna o na keikikane a pau o ke aupuni, i ke kiki hookahi, a elua, a ka makua; aole i pili keia kanawai i na keiki lehulehu a ka makua, he kanawai okoa ko lakou, aia ma ka aoao 23. "No na makua i lehulehu na keiki, a me na mea nawaliwali."
            O na keiki i oleloia ma ka aoao 18, i hala na makahiki 14, e haawi aku lakou i hapaha i ka makahiki hookupu dala okoa a ke kane, a i ka makahiki hookupu hapalua o ke kane, e haawi aku ke keiki i ka hapawalu no kona kino, oia ka auhau no na keiki i oleloia ma ka aoao 18, a hiki i ka iwakalua o na makahiki, ua kanaka makua, e hookupu dala okoa.
          Aole pauku e ae ma ke kanawai e hoike mai ana i ka auhau e ae no ua poe keiki la i oleloia ma ka aoao 18 o ke kanawai, aole kanawai ma ke kumu kanawai e hoike mai ana i ko laua like ana.
          Ma ka aoao 23 o ke kanawai, oia ke kanawai no na makua i lehulehu na keiki a me na mea nawaliwali! Ua pili paa ia kanawai i na keiki lehulehu a na makua; ma na keiki ka auhau ana, a o na makua, o na keiki lehulehu, ua kaawale lakou i ka auhau ma ke kino a me ko ka aina a me na hana e aku, e like me ke ano o ke kanawai.
          A penei ka auhau ana o na keiki i hala na makahiki 14, ekolu makahiki e hookupu ai i ka hapaha, a hala na makahiki 16, elua makahiki hookupu hapalua, a hala ka 18, e kau i na hapaha ekolu, a hiki i ka 20 o na makahiki, ua kanaka makua, alaila, e kau ia ma ke kino i ke dala okoa.
          Ua pili keia kanawai i na keikikane wale no a me na kaikamahine; ua kaawale loa ka auhau no na