Ka Nonanona, Volume III, Number 23, 2 ʻApelila 1844 — Page 223

1844.) KA NONANONA. 223

            Eia hoi kekahi. Ua kokua mai ke Akua ia Puako, a me Kawaihae kai i keia makahiki i hala aku nei. Ua ninini mai oia i ka Uhane Hemolele maluna o na kanaka pono, a ua hoi mai kekahi poe hoahanau auwana. Nolaila e pono ke hoomaikaiia'ku ke Akua no kona kokua ana mai i keia mau aina. Nui na hoahanau, he hapa ka poe mawaho.

BATIMEA PUAAIKI.

            "Mai hoole mai ia'u, wahi a Batimea ia Aneruwahine. Ua paa ko'u manao e ao aku i ka palapala." A ike ka wahine i kona makemake, ua ae aku ia, a komo mai Batimea iloko o kona hale me na kamalii. Ua ikaika loa kona imi ana e ao, no ia mea, ua loaa ia ia kona makemake nui o ka ike i ka palapala. Aole nae he mea nui kona ike; no ka mea, ua powehiwehi kona ike maka ana, a ua kokoke elemakule no hoi. A mahope, i kuu noho ana ma Hilo, a ao aku kuu wahine i kekahi poe, ua komo mai o Batimea, a mahuahua kona ike, a hoomaka oia e kaha ma ka papa pohaku. Aka, no ka mai hou o kona mau maka, aole hiki ia ia, ke hoomanawanui ma ka imi naauao. No ia mea, me ka eha, a me ke kaumaha o ka naau, ua ae no nae i ko ke Akua makemake, ua haalele oia i ke kula, aole komo hou malaila. Aka, i ko'u manao, aole make hewa kona hele ana i ke kula, a me kona imi ana e ao i ka palapala. Ua make pono no, no ka mea, o kona huli ana i ka palapala, o kona ao ana i na hua, a me ka hookui e like me ke keiki liilii, a o kona hoomanawanui ana a hiki ia ia ke heluhelu i ka pauku a me ka mokuna o ka Baibala, ua lilo ia mau mea, i mea e ikaika ai na kanaka o Hilo ma ka imi ana i ka ike a me ka naauao.  Ua nui no hoi ko Batimea hauoli ana i kona heluhelu ana i ka olelo a ke Akua me kona mau maka ponoi! no ka mea, ua ono loa ia ia ka Baibala.
          He mea nui loa ko Batimea hana ana ma Hilo. I na la Sabati, a me na la noa, iloko o ke kula Sabati a ma kona hale iho, ua imi ikaika oia e hoohuli i na kanaka a me na kamalii ma ka pono. O ko'u hoahana aloha ia i ko'u noho ana ma Hilo. Ua hele pu oia me au i ko'u hele ana ia wahi aku, ia wahi aku e halawai me kanaka a e hoohuli ia lakou ma ko ke Akua aoao. Ua hauoli au i kuu lohe ana i kana olelo, i kona kamailio pinepine me na elemakule, a me na luwahine, a me na makua mea keiki, a me na kamalii. Ua hele pinepine na hoahanau a me na kanaka ma kona hale e kamailio pu me ia, a e hoolohe i ka olelo oiaio a me ka pololei i puka mai loko mai o kona waha. I kona hookipa ana i kona poe hoahanau, a me na hoalauna, ua paipai mau oia i ko lakou manao e huli koke i ke Akua, a e hoonani i kona inoa. Pela o Batimea, ua hoomau oia i kana hana nui ana i ka hana a ka Haku.
          I ko'u holo ana i Wailuku ma Maui e lilo i kumu malaila, ua noho o Batimea ma Hilo, no ka mea, ua aua na hoahanau malaila, aole lakou haawi mai ia ia i kookoolua no'u ma kuu aina hou. Aka, i ka makahiki 1834, aole ia 1835 paha, ua holo mai no ia i Wailuku e noho pu me makou. Malaila oia i noho ai, a malaila i kumuia'i oia. Nui ko maua me Limaikaika hauoli i ko maua noho pu ana, a hana pu ana me ia. Ua hele pinepine oia i Honuaula, a i Kula, a i Hamakua kekahi, a hoi