Ka Nonanona, Volume III, Number 22, 19 Malaki 1844 — Page 118

118 KA NONANONA. MA RAKI,

pule no na Kulanui. Ia la, pule nui no ka poe haipule i ke Akua i hoohanau hou ia na naau o na haumana o na Kulanui, i lilo keia poe naauao i poe kokua ma ka aoao o ke Akua. E pono i na haipule ma keia pae aina e hoomanao ia la, a pule nui i ke Akua no ke Kulanui a no na kula e ae o Hawaii nei.
Na'u na KALAKA.

PULE HOOMAU.

                Mai ka la 10 o Ianuari, i ka la 14, oia na la pule hoomau ma Wailuku nei. Hele nui mai na kanaka o Honuaula, a me Kahikinui, a piha loa no ka hale pule. Kokua mai o Mika Gerina ma keia hana i kekahi mau la. Ua hoala paha ke Akua i ka manao o kekahi poe e imi i ke ola o ko lakou uhane. Ua bapetisoia kekahi poe hou he 53. Ua makaukau paha lakou, aole paha. O ke Akua ka i ike. Na KALAKA.

NO NA KUMU. HELU II.

                Auhea oukou, e na kumu i heluhelu i kuu palapala mua.
                Eia keia manao hou. Mai lilo oukou i poe puniwaiwai.
                E puni naauao. Mai manao ua lilo oukou i poe naauao loa, a e noho wale a nalowale kahi ike i loaa. E imi hou no. E huli pinepine i na palapala a oukou i imi ai mamua. A pai ia ka palapala hou, e imi koke a e hana hou aku no, i mahuahua ae ko oukou ike i kela malama i keia malama. He mea hilahila i ke kumu ke haalele i ka imi ana, a uhi hou mai ka naaupo ia ia.
                E imi i naauao na haumana. Mai puni waiwai i nawaliwali ka ao ana aku, a i ikaika ma na hana e ae. Mai haalele hoi i ka oukou oihana no ka manao e nui ae ka waiwai ma na hana e. Mai wikiwiki e haalele i ka oukou mau kula no ka uuku o ka uku, a no ka hookaa ole ia mai no hoi.
                Aloha no au i ka lohe ana i ka pilikia o kekahi poe o oukou, i ka hookaa ole ia mai o ka uku, i ko lakou ao ana i ka makahiki okoa a me ka hapa, a kaa mai ka hapaha, hapaono, hapawalu, a hapaumi wale no ka uku i olelo ia mai. Aka, mai hoomolowa malaila. Ina manao kekahi e hoopii aku imua o na luna kiekie i maopopo ke kumu o keia hookaa ole ana, aia no ia ia. Aole au e hoohewa aku ia mea. Aka, mai haalele iki i ka hooikaika ana i naauao na kamalii, a i pono ke Aupuni.
D. B. LAIMANA.

Wailuku, Feb. 28, 1844.
                No ka make ana o Hawaii, kekahi luna ekalesia ma Wailuku.
                Aloha oe e ka Nonanona; Ua hina kekahi kia hou o ka ekalesia ma Wailuku nei, o Hawaii kona inoa. Ua moe kona kino me ko Batimea, a ua halawai hou paha ko laua uhane ma ka lani. Ua hele ia i ka pule i ka la Sabati, a i ka po akolu make no ia. I ka la 21, o keia malama kona make ana, a i ka la 23, ua waiho makou i kona kino ma ka lepo me ko Batimea, me ka uwe nui ia ia. Olelo aku au i ka poe halawai e kanu i kona kupapau ma keia olelo. "E kokua mai, e Iehova, no ka mea, ua oki ke kanaka lokomaikai, ua pau hoi ka poe hoopono iwaena o na keiki a kanaka." Halelu 12: 1. Ekolu hoahanau i aloha nui ia, ma Wailuku nei, i hele aku, o Batimea, o Poipe a me Hawaii. He mau mea lokomaikai a hoopono lakou a pau. Ua ike pono oe ia lakou, a me ko lakou noho haipule io.
                He kanaka elemakule o Hawaii,