Ka Nonanona, Volume III, Number 22, 19 March 1844 — Page 115

1844.) KA NONANONA. 115

BATIMEA PUAAIKI.

                Nani ka waiwai o ko ke Akua aloha mai i na kanaka e moe ana iloko o ke kiolepo o ka haumia, i kona kii ana ia lakou, a i kona hoolilo ana ia lakou i poe ohua nona, a i poe hooilina hoi o kona aupuni ma ka lani! Pela ke ano o kona aloha ia Puaaiki. Ua ike kakou ia ia e noho ana me ka walania o ka naau a me ka mihi i kona hewa. Ua ike kakou ia ia malalo o ke kea e manaoio ana i ka mea i kaulia maluna. Ua ike kakou ia ia e auau ana iloko o ka wai bapetiso. Ua loaa ia ia ma ka bapetiso, ka inoa o Batimea mamuli o ke kanaka makapo kahiko i hoolaia e Iesu. Pela o Puaaiki ke kanaka makapo o Hawaii nei.
                O ka hua o ka naau hou ona ua ike pinepine ia e na kanaka he lehulehu, a malaila, ua ikeia he hua ia o ka Uhane Hemolele. He oluolu nui ko'u i kuu hoike ana i ka maikai o kona noho ana mai ko'u ike mua ia ia a hiki i kona make ana.
                I ka malama o Iulai, M. I. 1828, ekolu makahiki mahope iho o ko Batimea komo ana iloko o ka ekalesia, ua pae au i Lahaina, a noho au malaila i kekahi mau malama. I ko'u noho ana i Amerika, ua lohe iki au i ke ano o Batimea. A pae makou i Honolulu, ninau au i na hoahanau, "Pehea o Batimea, ka hoahanau makapo au i lohe ma Amerika?" I mai lakou, "Aia no i Lahaina, e kupaa ana ma ka pono, a e hana ana ma na mea e pono ai ke aupuni o ka Haku." No ia mea, ua makaukau au e apo aku ia ia me he hoahanau aloha la iloko o ka Haku. A pae makou i Lahaina, hele koke mai oia e ike mai ia makou, a e moe mai, no ka mea, nui kona olioli i ka mahuahua ana o na misionari ma keia pae aina. Ia manawa, aole hiki ia'u ke kamailio pu me ia, aole au ike ia ia ma ke kamailio ma ka ike maka ia ia iloko o ka hale o ke Akua, a ma kona hale kekahi. Ua maopopo ia, he mea e kona aloha i ka luakini o Iehova. O ka mai nui, oia wale no ka mea hiki ole ia ia ke hele ilaila. Aole kali ia e hoomaka ia ka hana ma ka hale o ke Akua. Komo wawe no ia, a hoolohe pono i ka olelo. Alawa pinepine ia'i kona mau maka-paa i ka mea nana ka olelo, me he mea makewai la e inu ana i ka wai ono. Aole maloko o ka luakini wale no, aole i ka la hoano wale no i ike ia ka makemake o Batimea i ka pono. I na la a pau loa, a ma na wahi a pau, ua hoonani aku oia i ke Akua, i kona Haku ola e ola'i. Ua ikaika loa oia i kona hoohewa ana i ka poe aia ma na wahi kiekie, a ma na wahi haahaa no hoi; ikaika hoi i kona hoopili ana i ke kanawai o Iehova i ka lunamanao o na'lii a me kanaka, a imi pinepine oia e hoolilo i na kanaka ma ko Iehova pono. Nui ka poe hoike i kona ikaika i kona imi ana e hoohuli ia lakou mai ko lakou hewa, a e alakai ia lakou io Iesu la, i loaa mai ia lakou ke kala ia mai o ko lakou hewa, a me ke ola mau o ko lakou poe uhane. Hoike mai kekahi poe me ka waimaka, a me ka hoomaikai aku i ke Akua no kona hoouna ana ia Batimea e hoohuli ia lakou ma ka pono. Pela o Daniela Ii, kekahi punahele o Liholiho, he hoapaani, hoainu rama ona; i keia manawa, he hoahanau ekalesia, he lunakanawai, a he kanaka hooponopono ma Maui Hikina. Olelo mai o Daniela ia'u mamua. "Ua kii pinepine mai o Batimea ia'u e hoohuli mai ia'u mai kuu hewa ana, i aloha