Ka Nonanona, Volume III, Number 21, 5 March 1844 — Page 111

1844.) KA NONANONA. 111

            O kekahi kumu keia i naaupo ai o Hawaii nei, o ka hoopii i ka uku.
          Ua lohe au no kekahi kanaka hana wati e noho ana ma Farani, he kanaka koikoi no ia ma ia hana; aka, o kona uku 6 peni 2 faretini, ua lohe no hoi au no kekahi poe ma Ame rika, ehiku makahiki e hana ai ma ia hana o ke kamana, me ka loaa ole o ka uku ia ia, aka, o ko lakou manao nui, o ka naauao, oia ka mea i mahuahua loa ai ka naauao ma na aina imi naauao.
          O ke kanaka o Hawaii nei, ea, he lapuwale loa ia i ko'u manao. Eia kekahi, he nui ka pomaikai i ka mea hoohaahaa ia ia iho: pela ka Iesu, o ka mea hoohaahaa ia ia iho e hookiekie ia ae oia.
          Oia hoi keia, o ka mea hoohaahaa ia ia iho malalo o kona haku kamana, e haawi mai no kela i kona ike a pau ia ia.
          Eia keia, he nui ka pomaikai i ka paahana kupono; o ka nui o kona waiwai no kana hana pono ana. Na W. E. MAIKAI.

HE KANIKAU NO LAHAINALUNA KA MOI WAHINE O KO HAWAII NEI PAE AINA.

O ka nani o Lahainaluna, ua hoolei ia oia ma na wahi papu ou.
Kai ka haule ana o ka poe naauao a me ka make ana o ka poe ike.
Mai haanui aku ia mea ma Kauai,
Mai hai aku hoi ia mea ma na palena o Hawaii,
O hauoli na kaikamahine a ka poe hewa.
O olioli hoi na keikikane a ka poe lapuwale.
E na puu o Auwaiawao, aole make ua,
Aole hoi na punawai a me na wai kahe iloko ou.
No ka mea, ilaila kahi i hooleiia ai ka paleumauma o ka naauao.
Ka paleumauma hoi o ka ike i poni ole ia i ka naaupo.
Mai ka awaawa ae hoi o ka poe hewa;
Mai ka momona ae o ka poe moekolohe.
E Lahainaluna e, ua nui loa kuu aloha ia oe:
E oi aku ana ke aloha i na alopeke;
A me ko na aeto i kona punana.
No ka mea, e like me ka opua hiki kakahiaka, pela ka'u mea i aloha ai iwaena o na kakalaioa.
E na keiki o Lahainaluna,
E kanikau aku oukou i ka ike;
No ka mea, nana oukou i hoaahu i ka ie nani;
A nana hoi i hoolei i ka lei alii ma ko oukou mau poo.
Nana hoi i kopipi i ko oukou wahi i ka mura a me ka aloe.
E ka punawai ono,
O oe ka i hookumuia i ka aina i ka polikuaakane;
Nau i hoike mai i ke ala o ka aina ike ole ia.
E ke kaikamahine hanohano o keia mau mokupuni he umikumamalua,
E aloha i kou mau makua ekolu;
I ka mea nana oe i hamo i ka aila poni kumu kuai nui;
No ko lakou aloha ia oe i poniia'i oe i alii.
He hilu oe he ia noenoe na ka nui hanauna o kou mau makua.
O kou inoa ke laweia la i ka hikina a ka la i Haehae.
O kou mea poni, aia ia i ka aina o Maunaaniani a me Muliwaiakea.
Ka mau ana o kou alii,
Mai ka aina puni ole hikina mai ia.
E ke kaikamahine hanohano,
E noho ana i ke kulanakauhale o Auwaiawao;
Ke aahu la oe i ke kapa hau o Lilinoe.
O kou mau koa, he mau kanaka i waeia noloko mai o na tausani,
Ke paa nei lakou i na mea kani a me na Violaumi.
Ka laha ana o kou nani, aia ia ma na welelau o ka honua.
Ka lohe ana i na mea kani, aia no ia i kou kulanakauhale;
Ka leo o na halelu he kahikoia nou i ka po a me ke ao.
O ka nani i lilo ai i kahiko nou,
I loaa ia i ka pua he mamo na Levi,
No loko mai o ka aina i paa i ka hau,
I hoopulu ia kona poo i ke anu o na mauna.
Na KUPANEA.
Lahainaluna, Maui, Ianuari, 25, 1844.