Ka Nonanona, Volume III, Number 21, 5 March 1844 — Page 110
110 KA NONANONA. (MA RAKI,
i ka hewa." I aku au, "kainoa o kau hana ia e hookolokolo i ka hewa a akaka, alaila hoopai. E hoopai ka oe i ke kanaka me ka hookolokolo ole." Hookuke mai kela ia'u; "kulikuli." I aku au, "ka inoa ua pau kou huhu? he huhu ka oe!"
Aloha aku au ia lakou,* a o ko'u hoi no ia a moe ma Kailua. Ia po kii nui kela mau luna ia'u e hikii i ke kaula. I aku au penei, "heaha ka hihia?" I mai la kela "aole ka oe i lohe ia Naheana e paa oe i ka hao?" I aku au, "o ka huhu o Naheana, oia ka ka mea e paa ai ke kanaka i ke kaula, me ka hookolokolo ole?" Ae mai kela. I aku au, "ka! akahi no kanawai poepoe ma Hawaii nei, o ka huhu o na luna, oia kuu mea e paa pinepine ai." Hikii kela i kuu mau wawae i ke kaula a kakahiaka ae hemo. Hoi aku au ma Kaohe, o ka la hoomalolo ia. I ke ahiahi Sabati kii hou ia mai au e paa i ka hao ma Haleili. Hai mai o Keaweamahi, he kanaono kumamalima a'u mau dala, "Hookahi ou makahiki a me na malama keu eono e paa i ka hao." Aole i hookolokolo, aole i hoakaka mai i ka hewa e paa wau i ka hao i hookahi makahiki a keu. O kuu paa iho la no ia i ka hao i keia mau malama elua o Novemaba a me Dekemaba. Elua pii ana i ke ko waa aupuni, na kane a me na wahine o ka halepaahao: hookahi waa hookahi hebedoma a hookahi waa hookahi hebedoma. Aole okana mai a ke anu, hui na wawae, maeele na lima. Hina pinepine na wahine i ke kaula ko waa, palapu ka ili; uwa na kanaka. Eia ko lakou wahi pakele iki, o ka hume ana i ka malo maloko, nalowale kahi huna. Pono anei keia hoohana pu i
* E noho ana o Puou, Kainapau, Isaia ma.
na wahine me na kane? Ahea la e hooikaika loa na lii e hooponopono i na hihia o kahi kuaaina? Ahea la e pau ko makou hookaumaha wale ia? Na'u na SETEPANO.
HEAHA KAUKU KUPONO I KA PAAHANA?
O ka uku ku pono i ka paahana a'u i manao ai: Penei, o ke kanaka akamai loa ma na hana; e uku ia no ia e like me kona akamai, oia ka uku kupono i ko'u manao.
Eia ka mea maopopo ma ko'u imi ana. I na i manao au e kukulu i hale pohaku nou; elua nae kanaka e hele mai e noi na laua e hana, ninau aku au ia laua; he mau mea akamai no olua i na hana, ae mai no laua; o kekahi kanaka nae, aole no ia i makaukau loa, no Hawaii nei no ia; o kekahi kanaka ua makaukau loa ia; a he kanaka keokeo no hoi noloko mai no ia o ka aina i paa i ka hau, o ua kanaka keokeo nei, he hoailona kamana kona; a o ua kanaka nei o keia poe aina, aole ona hoailona kumu, makemake no laua elua i hookahi dala o kekahi; a pela no hoi kekahi no ka la.
Mahea la kakou e manao nui ai? ke manao nei au ma ka haole au e manao nui ai. Penei e akaka ai, ina he haole paahana akamai loa, kuhikuhi wale no wau i ke ano o ka hana ia ia; a pau ia, ia ia wale aku no ka hana o ia wahi. Aole pela ke kanaka makaukau iki i na hana, hoopilikia wale mai no ia i ka mea waiwai, e hele e nana pono i ke ano o ka hana, oia ka pono nui o ka mea waiwai i kou manao ana, ke manao nei au i hapaha ko kona la; a o ka haole hoi i dala ko kona la; oia kauku ku pono i ko'u manao ana no laua a elua.